VOV4.Jarai - Tlam mơmŏt lơ 7/9, jing lơ 12/8 tui blan di, hơdôm anom bruă gum hrŏm pơphun mlăm ngui hăng anăn “Mlăm blan bơrơmi”, ƀơk anung gơnam brơi kơ ƀing čơđai, pơlir hăng bruă khăm pơjrao, ƀơk brơi jrao soh sel brơi mơnuih ƀon sang ƀun rin ƀơi ƀuôn Ea Na, să Ea Na, tơring glông Krông Ana, tơring čar Dak Lak. Tui anun, hrŏm hăng mông ngui adôh suang amăng “Mlăm blan bơrơmi” anun lĕ ngui; suang rơñia grai, adôh suang, ngui hơdôm tơlơi ngui đưm amăng mlăm blan bơrơmi, 750 čô čơđai ƀơi ƀuôn Ea Na hơmâo arăng ƀơk brơi gơnam.

Giăm 750 čô čơđai ƀơi ƀuôn Ea Na, să Ea Na, tơring glông Krông Ana tŭ mă anung gơnam

Hơdôm anom bruă ăt jao 57  anung prăk djru hrăm hră brơi ƀing čơđai gir hrăm hră. Abih tih anung gơnam hăng prăk djru hrăm hră lĕ 80 klăk, yua Kông ti pơčruh ngăn Kmơk Bình Điền hăng Sang ia jrao Thiện Hạnh djru brơi. Laih dong, ƀing ơi ia jrao, nai ia jrao mơng sang ia jrao Thiện Hạnh pơphun khăm pơjrao, ƀơk jrao brơi 500 čô mơnuih ƀơi ƀuôn Ea Na, hăng abih tih giăm 50 klăk prăk.

Siu Đoan: Pơblang