VOV4.Jarai - Mơmot lơ 30/8, Hlăk ai tơring čar Dak Lăk pơphun hrơi jơnum prong ngă mittinh Kâo khăp kơ lŏn ia hăng bơni kơ 69 čô mơnuih, grup hlăk ai rơgơi ngă bruă. 69 čô hăng khul grup hlăk ai hơmâo pơpŭ bơni ƀơi 7 mơta bruă: Khua khul rơgơi; hlăk ai hơdip hiam; sang anŏ hlăk ai hmư̆ hing; hlăk ai pơphun bơwih ƀong rơgơi; hơdôm grup hlăk ai ngă bruă hiam; hlăk ai drơi jăn ƀu klă samơ̆ ngă bruă rơgơi; hlăk ai djuai ƀiă, hlăk ai gah khul đăo ngă bruă hiam. Anai jing gru kơnuih hơmâo lu tơlơi gum pơgôp prong amăng bruă hlăk ai ƀơi tơring čar, pơdah rai pran jua kơsung nao hlâo, hur har pran jua ngă bruă, hơdip klă hiam, ba jơlan hlâo amăng khul grup hlăk ai.

Dak Lăk bơni kơ hlăk ai hơmâo tơlơi hơdip hiam.

Ƀrô hrơi anai mơn, Khul hlăk ai tơdăm dra Việt Nam tơring čar Dak Lăk hơmâo brơi 2 anung prăk pioh bơwih ƀong hơmâo nua 40 klăk kơ 2 čô hlăk ai ƀơi tơring glông Lăk hăng Krông Năng; brơi pri pơplông tơlơi adoh hơkrŭ lŏn ia, hlăk ai adoh tơlơi adoh đưm hăng pĕ gông atông brô̆ laih anun pơđut Hrơi jơnum prong Kâo khăp kơ lŏn ia kâo tơring čar Dak Lăk thun 2022 hăng lu bruă mă sit nik, yôm pơphăn.

Siu H’Mai: Pơblang