Hmư̆ hing lĕ, čơđai sang hră Dak Lăk hơmâo mă 114 pri ƀơi Tal pơplông ruah čơđai hrăm rơgơi dêh čar sang hră gưl 3, hơmâo 3 pri Sa, 21 pri dua, 34 pri klâo hăng 56 pri pơtrut pơsur. Anai jing bruă hmư̆ hing hloh mơ̆ng hlâo truh kơ ră anai, ba Dak Lăk dong mrô 12 amăng 34 boh tơring čar, ƀôn prong.

Amăng tal pơplông boh thâo Khoa học - Kỹ thuật gưl dêh čar, čơđai sang hră tơring anai hơmâo mă 1 pri dua, 1 pri klâo hăng 3 pri pă. Dua mơta bruă “Pơkra pơjing gơnam hrŭp hăng klĭ mơ̆ng kơđuh sâu riêng” hăng “Pơmut amăng boh thâo mrô ngă bơrơđah glăi rup gru grua gơnam yom mơ̆ng đưm, pioh amăng anih djă pioh gơnam đưm plang internet kiăng mơnuih nao lăng dưi gư̆ tut, ĕp lăng” jing mă Pri Mah WICO 2026 ƀơi Seoul, Hàn Quốc. Ƀrô tal anai, tơring čar apah bơni kơ ƀing čơđai hăng nai pơtô brơi ƀing čơđai hơmâo mă pri.