Grup hơduah ĕp hơmâo mă bruă ƀơi ƀuôn Kli A (phương Ƀuôn Hồ), ƀuôn Tuôr (să Hòa Phú), ƀuôn Tơng Jŭ (să Ea Kao) hăng ƀuôn Akŏ Dhông (phương Ƀuôn Ma Thuột). Mơng hơduah ĕp brơi ƀuh, tơdơi kơ hơmâo Kơnuk kơna djru brơi, lu sang anŏ hơmâo mă yua ngăn rơnoh, pok prong tuh pơ alin, pơjing hơdôm gơnam ĕp lăng pơlir hăng gru grua djuai ania, bruă pơkra gơnam sô hơđăp hăng bơwih ƀong ngă hmua, ƀơƀrư̆ ba glăi bruă bơwih ƀong kơ mơnuih ƀôn sang amăng plơi pla.

Hơdôm boh ƀon lan ăt rơkâo tŏ tui pơgiong hơdră bruă tui jơlan gah kơtưn pơtop hrăm, djru lăi pơthâo, pơjing gơnam yôm phara, hrưn đĭ tơlơi thâo thăi amăng bơwih brơi tuai čuă ngui, pơhiăp tơlơi tač rơngiao hăng pơtrut pơlir kơplah wah hơdôm boh sang anŏ mut hrŏm bơwih brơi tuai amăng plơi pla. Ơi Y Kle Knul, kơ-iăng khua anom bruă gru grua să Hòa Phú brơi thâo: “Kiăng tŏ tui đing nao djru brơi ngăn rơnoh kiăng djă pioh sang Êđê, bruă mơñam abăn ao, gru grua čing hơgor, hơdôm tơlơi ngă yang sô hơđăp hăng pơjing gơnam pơyơr pơdah gru grua yôm phara mơng ƀon lan. Kơtưn amăng bruă pơsur, lăi pơthâo, pơjing tour tơkuh nao rai Ƀuôn Tuôr hăng hơdôm anih čuă ngui amăng tơring čar kiăng pơhưč lu tuai hăng hrưn đĭ tŭ yua amăng mă yua hơdôm gơnam bơwih brơi tuai čuă ngui amăng plơi pla”.

Tui yă Đỗ Thị Như Tình, Khua anom bruă djuai ania Jơnum min pơ ala mơnuih ƀôn sang tơring čar Dak Lak, tuai čuă ngui amăng plơi pla ƀu djơ̆ kơnog dưi pơđĭ kyar hơđong kjăp lơm mơnuih ƀôn sang sit nik jing pô phun mut hrŏm, tŭ mă tơlơi dưi mơng bruă tuai čuă ngui. Bruă mă yua lăp djơ̆ rơnoh yôm gru grua ƀu djơ̆ kơnong pơgôp djă pioh gru grua đôč ôh mơ̆ ăt ngă pơhưč, hrưn đĭ tơlơi yôm mơng hơdôm anih čuă ngui ƀơi Dak Lak. Boh than hơduah ĕp amra lĕ atur phun yôm phăn kiăng anom bruă bơdjơ̆ nao lăng glăi boh tŭ yua hơdră bruă ră anai hăng ba tơbiă hơdră lăp djơ̆ amăng rơwang phrâo. “Grup hơduah ĕp ăt tŭ mă hơdôm tơlơi lăi glăi sit nik amăng pok pơhai ngă tui tơlơi pơtrun hăng hơdôm hơdră bruă amăng ƀon lan. Hluai tui anun amra kơsem min, rơkâo pok pơhai sa tơlơi pơtrun phrâo amăng pơđĭ kyar tuai čuă ngui amăng plơi pla pơlir hăng djă pioh hăng tŏ tui gru grua amăng rơwang pơ anăp kiăng ba glăi boh tŭ yua ƀiă”./.