Nao jơnum hrŏm hăng đĭ pơhiăp ƀơi mông jơnum, Kơ-iăng khua pơ ala mơnuih ƀôn sang dêh čar, yă Nguyễn Thị Thanh rơkâo rim čô khua pơ ala kiăng pơđĭ tui rơnoh ngă bruă, tơlơi hur har amăng bruă mă thâo pơčeh phrâo kiăng ngă klă bruă jao pơblih phrâo amăng rơnuk pơđĭ kyar mơ̆ng lŏn ia.

Kơ-iăng khua pơ ala mơnuih ƀôn sang dêh čar lăi pơtong, khua mua pơ ala mơnuih ƀôn sang dêh čar lĕ ƀing ngă bruă kah hăng gong jơlan pơtruh brơi bruă khua pơ ala mơnuih ƀôn sang dêh čar, amăng anun hơmâo khul ngă bruă gơgrong sa hnơ̆ng bruă pô glăm ba phun. Ră anai, tơlơi či kiăng lĕ čih pơkra tơlơi phiăn jai hrơi tong ten, kiăng sem lăng lu mơta, dơlăm hloh, kơnang kơ bruă pơsit glăi tơlơi phiăn ƀiă hrơi hloh. Yua kơ anun, ƀing pơ ala mơnuih ƀôn sang dêh čar khom prăp lui hlâo, pơblih kơtang hloh, ngă tui djơ̆ tơlơi thâo tom găn rơgao hăng jing ƀing ngă gong jơlan phun amăng bruă pơblih phrâo. Tui hăng akŏ bruă, rơngiao kơ bruă čih pơkra tơlơi phiăn hăng krăp lăng, rim khul grup amra pơphun sa bruă mă pơtong rơđah tơlơi hơmâo amăng tơring čar pô kiăng thâo krăn sit nik, tong ten, bơwih brơi kơ bruă čih pơkra tơlơi phiăn hăng lăi pơthâo tơlơi či kiăng mơ̆ng mơnuih ƀôn sang.