Hơdôm hrơi hăng anai, hơjan na nao rim hrơi, ƀơi hơdôm anih man pơdong sang hră kơnuk kơna čem rông pơ guai dêh čar tơring Gia Lai. Ƀơi să Ia Chia, bruă man pơdong gah rơngiao jing pơdơi hĭ lu wơ̆t. Lơ̆m ưt hơjan kah, hơdôm rơtuh čô kông ñơn gir ngă bruă pơhrua tui kiăng hmao. Ơi Vũ Phúc Tuân - Khua ring bruă ƀơi să Ia Chia, tơring čar Gia Lai brơi thâo: “Hăng hơdôm bruă kiăng man pơdong dŏ lu đôč, Phun kông ti gơmơi glăk iâu mơnuih mă bruă mơ̆ng kual Kơdư rai pơ anai. Kiăng tañ truh, gơmơi blơi wĕ rơdêh por, kiăng ƀing kông ñơn rai mă bruă. Ră anai, kiăng pơkra giong, gơmơi iâu 40-50 čô kông ñơn mơ̆ng Kơdư adih rai pơ anai. Rơngiao kơ anun, gơmơi mă măi pruih, wơ̆t hăng ƀing mă bruă kiăng ngă tañ ƀiă, ngă bruă rơgao mông, apah thim prăk dong kơ ƀing kông ñơn”.

Sang hră kơnuk kơna čem rông pơƀut dua gưl hrăm ƀơi Ia O ăt pơsur kiăng ngă giong mơn. Ơi Nguyễn Dũng Anh, Kơ-iăng khua wai lăng ring bruă brơi thâo, hơdôm bruă mă aka ƀu giong leng kiăng mơnuih rơgơi soh, tơnap biă či ruah mơnuih mă bruă jăng jai. Pô gơgrong man pơdong kơnong dưi ngă pơhrua mông mlăm đôč yơh: “Ră anai, hơdôm bruă dŏ glăi kiăng mơnuih apăn bruă soh mơ̆ng dưi, kah hăng dưm truă atur sang, pơhrup kiăng hiam hnun hnai. Gơmơi glăk iâu thim mơnuih či ngă mlăm dong, ngă rơgao mông đah mơ̆ng tañ giong. Abih bang mơnuih apăn bruă hrŏm hăng mơnuih mă bruă leng kơ gir soh yơh, đah mơ̆ng dưi jao glăi sang hră hlâo kơ hrơi mut thun hrăm phrâo”.

Truh ha mơkrah blan 8, bruă man pơdong dưm truă abih bang 7 boh sang hră kơnuk kơna čem rông gưl sa hăng gưl dua ƀơi hơdôm boh să gah guai tơring čar Gia Lai hơmâo ngă giong năng ai 85%. Hơdôm anih hrăm, sang đih pit, sang ngui ngor hơmâo ngă ƀiă či giong laih, samơ̆ sang ƀong huă, tơnă hơbai, sang khua, anih nai pơtô dŏ ăt kaih mơn mơ̆ng 5 hrơi truh kơ ha mơkrah blan.

Kiăng djru ba hơdôm anom bruă man pơdong ngă tañ ƀiă, pơhrua tui mông ngă bruă, giăm 780 čô khua, tơhan ƀô̆ đô̆i gir nao pơ sang hră djru ngă pơgiong hĭ hơdôm bruă hơmâo jao. Đại tá Nguyễn Công Ngân - Kơ-iăng khua ping gah Sư đoàn 320, Quân đoàn 34, git gai tơhan mă bruă ƀơi sang hră Ia O brơi thâo: “Kơnong Khul tơhan 34, gơmơi djru ƀơi să Ia O, hơmâo ngă giong laih bruă djru man abih tih rơbêh 3000m2 pơnăng sang hră. Rơgao kơ hrơi pơkă mơ̆ng kơnôl 18/7 laih. Ră anai, gơmơi djru ba dong mơn, man pơdong hơdôm anih amăng lăm sang hră dong”.

Lu wơ̆t hrơi tơjuh, khua mua Jơnum min mơnuih ƀôn sang tơring čar Gia Lai nao sem lăng na nao anih man pơdong, pơhiăp tom pô gơgrong tuh pơ alin hăng pô man pơdong đah mơ̆ng pơklaih brơi anŏ tơnap. Ơi Lâm Hải Giang, Kơ-iăng khua jơnum min mơnuih ƀôn sang tơring čar Gia Lai, pơsit tơring čar ƀu pơplih ôh hrơi pơkă man giong sang hră; kiăng hơdôm anom bruă iâu pơhrua tui mơnuih mă bruă, măi mok, man pơkra lăp djơ̆ hăng ngă pơgiong hlâo hơdôm anih kiăng mă yua hlâo amăng thun hrăm phrâo: “Hơdôm anom bruă, pô gơgrong man pơdong khŏm thâo rơđah laih, kiăo hmao thun hrăm phrâo ƀơi 7 boh sang hră kơnuk kơna čem rông jing tơlơi pơtrun mơ̆ng ngŏ, tơlơi pơtrun mơ̆ng sit hơtai boh ƀing gơñu. Ngă hiưm pă, ƀing ta khŏm găn rơgao hĭ anŏ tơnap, gir kơtir yơh, khŏm dưi man giong hơdôm anih anom bơwih brơi kơ bruă hrăm hră mơ̆ng ƀing čơđai amăng thun hrăm phrâo, kiăng ƀing ană amon hơmâo sang hră phrâo”.

Dŏ rơbêh ha wơ̆t hrơi tơjuh đôč truh laih hrơi mut thun hrăm phrâo, ƀơi hơdôm anih man pơdong sang hră kơnuk kơna čem rông pơƀut gưl sa hăng gưl dua ƀơi hơdôm boh să gah guai tơring čar Gia Lai, hơdôm anom bruă glăk kơtưn ngă bruă đah mơ̆ng man pơgiong, čơkă hơdôm rơbâo čô čơđai mut thun hrăm phrâo amăng sang hră phrâo./.