VOV4.Jarai - Hăng hơdôm bruă mă sit nik anun lĕ man pơdong brơi sang dŏ; čem rông ba ƀing amĭ Việt Nam sông kơtang truh djai ba, juăt nao tơña bla, pơ alum pran jua, ƀơk brơi gơnam tam…tơlơi anai ngă tơdŭ ƀiă tơlơi ruă kă yua blah wang pioh glăi, djru brơi hơdôm sang anŏ tơhan djai pơsăn drơi, ƀing djru hơkrŭ amăng tơring čar Dak lak hơmâo tơlơi hơdip jai hrơi hiam klă tui.

Dŏ amăng sang khăp pap phrâo man pơdong, yă Lê Thị Tường Vân dŏ ƀơi tơring kual Quảng Phú, tơring glông Čư̆ Mgar, tơring čar Dak Lak, hok mơ-ak brơi thâo, blan 3 laih rơgao, hơmâo gong gai ƀon lan djru brơi 50 klăk prăk, neh met wa, kơnung djuai, đa hơmâo ƀiă brơi čan ƀiă, tui hluai hơmâo brơi čan pơhrua dong, sang anŏ hơmâo man pơdong sang phrâo. Ră anai ayong rơwen rơwo amra hơmâo anih dŏ hơdip agaih rơ-ơ̆, laih dong ăt hơmâo pra yang dưm rup ama ñu, djai pơsăn drơi amăng rơnuk blah ayăt Mi ăt hơmâo pơkra ming hiam ƀiă dong:

“Sang anŏ ăt tơnap tap, ĕp prăk kiăng kơ čem rông ayong kâo ruă kă, glêh tơnap biă mă, yua kơ hơmâo kơnuk kơna djru brơi, sang anŏ dưi man pơdong sang phrâo, kâo hok mơ-ak biă mă. Kâo bơni kơ anom bruă tơhan rơka hơmâo djru brơi ayong kâo”.

Yă Lê Thị Tường Vân (ao mriah) hok mơ-ak dŏ amăng sang phrâo

Hrŏm hăng bruă man pơdong sang khăp pap, hơdôm bruă bơwih brơi hơdôm sang anŏ tơhan djai pơsăn drơi, mơnuih djru hơkrŭ ăt hơmâo tơring glông Čư̆ Mgar đing nao ngă tŭ yua. Ơi Bùi Đức Khương, mơnuih rơka rơkač mrô ¾ dŏ ƀơi ƀut plơi 2B, să Ea M’nang brơi thâo, rơngiao kơ bruă djru brơi prăk kak hmao tlôn tui hơdră djru mơng Kơnuk kơna; Ping gah, gong gai ƀon lan, djop gơnong bruă, khul grup lêng kơ pơphun nao tơña bla, pơ alum pran jua, ƀơk gơnam tam.

“Sit biă ñu ană bă gơmơi dưi truh prong giong mơnuih ăt gơnang nao ƀơƀiă, samơ̆ ăt kiăng kơnuk kưona djru brơi ană bă ƀing tơhan rơka rơkač tơdơi anai hơmâo hơdôm hơdră djru brơi dong ƀing tơhan ayăt mă krư̆ sang mơnă đưm hlâo adih. Sit biă ñu ƀu djơ̆ kơnong sang anŏ ƀing gơmơi đôč ôh, lu sang anŏ tơhan rơka, tơhan djai pơsăn drơi hăng sang anŏ hơmâo mơnuih djru hơkrŭ ăt hơmâo anom bruă tơhan rơka rơkač đing nao biă mă mơn. Lơ̆m dju djuam duam ruă kah hăng bưp tơnap tap, laih dong lơ̆m sang pok bơbung, răm rai yua hơjan kơthel lêng kơ hơmâo tơlơi gum djru hmao tlôn”.

Tơring glông Čư̆ Mgar ră anai hơmâo rơbêh 3.000 čô mơnuih djru hơkrŭ; 5 čô amĭ Việt Nam sông kơtang dŏ hơdip. Ơi Nguyễn Hồng Minh, Khua anom bruă mă, tơhan rơka hăng mơnuih mơnam tơring glông Čư̆ Mgar brơi thâo, gưl Ping gah, gong gai djop gưl đing nao biă mă, git gai ngă tui hơdră djru brơi mơnuih djru ngă hơkrŭ.

“Truh ră anai abih bang sang anŏ kơnuk kơna čem rông ba amăng ƀon lan lêng kơ hơdip hơđong ƀiă yơh, đa hơmâo sang anŏ hrưn đĭ tơlơi hơdip jơnap ƀiă pơhmu hăng sang anŏ pơkŏn, hơdră djru brơi mơnuih djru hơkrŭ lêng kơ pok pơhai tong ten lăp djơ̆ hăng tơlơi pơkă, sit biă ñu rơnoh prăk djru hơmâo jao hmao tlôn tơl tơngan ƀing mơnuih djru hơkrŭ”.

Đơ đam tơring čar Dak Lak hơmâo rơbêh 45.000 čô mơnuih djru hơkrŭ. Bruă bơwih brơi tơlơi hơdip mơda kơ hơdôm sang anŏ kơnuk kơna čem rông ba, mơnuih djru hơkrŭ lêng kơ hơmâo djop gưl, gơnong bruă đing nao biă mă. Hrŏm hăng bruă ngă klă tui hơdră djru mơng Ping gah, Kơnuk kơna, amăng 5 thun giăm anai, djop ƀon lan amăng tơring čar hơmâo ngă tui bruă bơwih brơi tơlơi suaih pral; djru prăk kak blơi măi mok ƀư̆ pơkra nam ruă, pơsuaih tơlơi ruă kă; djru pơkra ming, man pơdong phrâo sang hăng abih tih rơbêh 70 klai prăk.

Tơhan rơka Bùi Đức Khương hur har pran jua yua tơlơi hơdip hơđong, ană dưi hrăm truh anih hăng hơmâo bruă mă

Tui ơi Nguyễn Quang Thuận, Kơ-iăng khua gơnong bruă mă, tơhan rơka hăng mơnuih mơnam tơring čar Dak Lak, mah bruă bowih brơi mơnuih djru hơkrŭ, sang anŏ kơnuk kơna čem rông ba hơmâo pơtrut kơtang amăng hơdôm thun laih rơgao, samơ̆ ăt aka ƀu djop ôh. Amăng tơring čar ăt dŏ 165 boh sang anŏ ƀun rin lĕ sang anŏ tui hơdră djru, giăm 1 rơbâo čô mơnuih djru hơkrŭ glăk dŏ hơdip amăng sang tơ̆i. Ơi Nguyễn Quang Thuận pơsit tong, hơdôm bruă anai amra pơsir hĭ tañ hloh pơ anăp anai.

“Pơ anăp anai ƀing gơmơi amra nao pel ĕp tong ten rĭm boh sang anŏ, rĭm boh plơi pla, sa lĕ sem lăng hơnong pơkă tui hơdră djru, tơdah sang anŏ anun tơnap tap ƀu hơmâo mơnuih mă bruă, ĕp prăk kak, amra rơkâo Ding jum čih anăn mơnuih tui hơdră djru kiăng kơ dưi tŭ mă prăk djru hăng gir run truh rơnuč thun 2022 amra pơsir hĭ 165 boh sang anŏ ƀun rin, pơpă dŏ kơƀah hơnong pơkă anai amra djru ngă gêh gal kiăng dưi pơklaih mơng ƀun rin. Hăng hơdôm sang anŏ tơnap tap aka ƀu hơmâo sang dŏ, gir run truh abih thun 2023 amra djru man pơdong sang brơi mơnuih djru hơkrŭ amăng đơ đam tơring čar”.

Ƀơi kual Dap kơdư dŏ lu sang anŏ tơnap tap, hơdôm bruă mă sit nik mơng djop gưl, gơnong bruă amăng tơring čar Dak Lak amăng thun blan laih rơgao hơmâo pơgôp hrưn đĭ tơlơi hơdip mơda brơi hơdôm sang anŏ kơnuk kơna čem rông ba, mơnuih djru hơkrŭ, ngă tui gru grua “Mơñum ia hơdor kơ pô klơi” mơng djuai ania ta.

Nam Trang: čih

Siu Đoan: Pơblang