Tui hăng hră lăi pơthâo ƀơi mông jơnum, amăng 6 blan akŏ thun, tơlơi bơwih ƀong huă mơnuih mơnam tơring čar Dak Lak hơđong laih. Rơnoh gơnam sĭ mơdrô amăng tơring čar him lăng pơhrui glăi giăm 24.500 klai prăk, đĭ tui 4% pơkă hăng tal anai thun 2022. Rơnoh prăk sĭ mơdrô hăng tač rơngiao hơmâo năng ai 810 klăk USD, đĭ tui 2% pơkă hăng thun hlâo. Khă hnun, rơnoh prăk pơhrui glăi duh jia kơnuk kơna lĕ hrŏ 16,6% pơkă hăng thun hlâo. Rơnoh prăk brơi čan tuh pơ alin kơ bruă čar kơnong ngă tui 18,1% akŏ bruă jao mơ̆ng tơring čar....

Ơi Phạm Ngọc Nghị, Khua Jơnum min mơnuih ƀôn sang tơring čar rơkâo djop gơnong bruă khom sem lăng, glăm ba hloh pơblang tong ten bruă mă hơduah ĕp lăng phun ñu mơ̆ng pơpă hăng lăi pơthâo hơdră pơsir anŏ ngă gun pơhưč tuh pơ alin, pơtrut bruă tuai čuă ngui...kiăng dưi ngă tơhnal pơtrun pơđĭ kyar bơwih ƀong huă mơnuih mơnam 6 blan rơnuč thun, djop gơnong bruă tơring čar, khua mua tơring glông kiăng ƀư̆ pơkra glăi, pơsir tañ tơlơi ngă bruă bơjăm nao rai tơlơi glăm ba amăng bruă mă laih anun pơtrut hmar pơsir bruă  khom giong.