VOV4.Jarai - Jơnum min mơnuih ƀon sang tơring čar Dak Lak glăk akŏ pơjing Khul ruah hơdrôm hră gưl tơring čar thun 2022-2023. Samơ̆, gơnong bruă pơtô pơjuăt Dak Lak pơsit tong bruă ruah hơdrôm hră amăng tơring čar Dak Lak thun hrăm 2021-2022 hăng hơdôm thun hrăm pơ anăp dong khŏm klă hloh, tơpă sit tui tơlơi pơkă. Hơdôm boh sang hră brơi thâo: Jơlan hơdră pơplih phrâo amăng pơtô hrăm samơ̆ kơnong ruah 1 truh pơ 2 hơdrôm hră ruah tui “Get phrâo, tơpai hơđăp”.

Gah gơnong bruă pơtô pơjuăt tơring čar Dak Lak brơi thâo, bruă ruah hơdrôm hră mơng Dak Lak hluai tui 3 grup hơnong pơkă: Lăp djơ̆ hăng tơlơi kiăng amăng bơwih ƀong huă-mơnuih mơnam amăng tơring čar, lăp djơ̆ hăng tơlơi gal amăng pơtô hrăm ƀơi hơdôm sang hră kah hăng hơdôm tơlơi pơkă pơkŏn. Ƀing nai pơtô mut hrŏm khul ruah hơdrôm hră lĕ ƀing mơnuih thâo rơgơi, arăng đăo gơnang. Amăng khul ruah hơdrôm hră gưl tơring čar ăt pơhlôm brơi rĭm kual, 15 boh tơring čar, plơi prong lêng kơ hơmâo nai pơtô pơ ala brơi kiăng pơhlôm tơpă sit, bơkơnar lăp djơ̆.

Siu Đoan: Pơblang