VOV4.Jarai - Tlam lơ 6/5, Jơnum min mơnuih ƀon sang tơring čar Dak Lăk pơphun jơnum mă tơlơi pơhing blan 4/2022 lăi pơthâo kơ tơlơi bơwih ƀong - mơnuih mơnam blan 4 hăng lăi glăi hơdôm tơlơi mơ̆ hră pơhing hơmâo lăi nao, hơmâo mơnuih ƀon sang lăp đing hmư̆. Bơdjơ̆ nao bruă hyu hơduah tơña, pơsit tơlơi ngă soh blơi gơnam pơčrang kman SARS-CoV-2 mơng Anom bruă wai lăng tơlơi duam ruă tơring čar Dak Lăk, Đại tá Nguyễn Văn Quy, Khua anom pơphô bruă, Kông ang tơring čar Dak Lăk brơi thâo: Bruă anai bơdjơ̆ nao bruă blơi gơnam pơčrang kman SARS-CoV-2 mơng Kông ti pơčruh ngăn Công nghệ Việt Á hơmâo ƀơi đơ đam dêh čar ta amăng hrơi blan rơgao.

Anom bruă wai lăng tơlơi duam ruă tơring čar Dak Lăk

Truh mông anai, Anom bruă hơduah ĕp kơđi, kông an tơring Dak Lăk pơsit Anom bruă wai lăng tơlơi duam ruă tơring čar hơmâo blơi rơbêh 63.000 boh măi pơčrang kman, hăng nua ñu rơbêh 10 klai prăk. Mơng bruă hơduah ĕp, sem lăng, anom bruă pơsit bruă anai ƀuh nam ngă soh tơlơi phiăn. Bơdjơ̆ nao bruă phrâo lăi nao, Khul hơduah ĕp kơđi tơring čar Dak Lak ăt glăk hyu hơduah ĕp kơđi bruă blơi măi mok, gơnam yua gah ia jrao, măi pơčrang kman, vaccine, hăng ia jrao pơgang Covid-19 ƀơi tơring čar.

Siu H’Mai: Pơblang