VOV4.Jarai-Hăng mrô rĭm hrơi čih pioh mơ̆ng 800 truh 1 rơbâo čô mơnuih ƀă covid 19, ngă kơ anom bruă ia jrao plơi prong Ƀuôn Ma Thuôt, tơring čar Dak Lak kơniă laih. Plơi prong Ƀuôn Ma Thuôt hlăk djru ba hơdră mă bruă beč bal, djơ̆ hnong pioh djru kơ bruă pơjrao F0 ƀơi sang anŏ.

Amai Võ Thị Thủy, mơnuih mă bruă pơ sang ia jrao phường Ea Tanm plơi prong Ƀuôn Ma Thuôt, tơring čar Dak Lak brơi thâo, hơdôm hrơi rơgao, ƀing ngă bruă gah ia jrao tơnap tap biă mă hăng bruă mă rĭm hrơi. Ƀu lăng hrơi mlam dơ̆ng tah, sit hơmâo telephôn iâu, kiăng nao djru pơjrao mơnuih ruă tơl sang anŏ lĕ, ƀing ngă bruă ia jrao phường Ea Tam tañ nao ĕp lăng mơtam.

“Sit gơñu hơmâo tơlơi mưn duăm, SPO2 gah yŭ kơ 96 lĕ buh ao hrôm drơi jăn hăng kơsu nao mơtam yơh, truă brơi đing oxy laih anun brơi suă pran hăng oxy giong, djru pơtô gơñu kơtit mă pơđĭ trun tơdu hăng kơtang hnong oxy. Tơdah dŏ pơ anun mơtam abih ha hrơi, sit mơ̆n ƀu anăm ôh, mông mơnit pơpă arăng iâu lĕ đuăi nao mơtam, 2-3 mông mlam hai ăt đi mơ̆n. Tơl ƀing F0 kiăng djru hơgĕt lĕ khom nao djru yơh. Mrô F0 mơ̆ng phường đĭ lu, gơmơi ƀuh kơniă laih hăng ƀing ngă bruă ia jrao ƀơi să phường ră anai”.

Mơnuih ngă bruă gah ia jrao pơtô brơi kơ mơnuih djơ̆ Covid 19 pơkĕ lăng Zalo hăng grup pơtô pơjrao mă F0 ƀơi sang anŏ

Tui hăng ơi Ngô Mạnh Cường, Khua sang ia jrao phường Ea Tam, plơi prong Ƀuôn Ma Thuôt, Ea Tam lĕ mrô mơnuih lu truh kơ 36 rơbâo čô mơnuih hăng jing phường čih pioh mrô mơnuih ƀă Covid 19 lu mơ̆n. Dơ̆ng mơ̆ng pok pơhai pơjrao F0 ƀơi sang anŏ truh ră anai, phường hơmâo djru brơi pơjrao mă pơ sang anŏ 1.300 čô F0, amăng anun 400 čô mơnuih suaih, kơnong 6 čô ba nao pơ sang ia jrao prong. Sang ia jrao phường Ea Tam hơmâo akŏ pơjing khul mă yua Zalo djru lăi pơthâo kơ mơnuih ƀă klin thâo hăng pơjrao mă pô pơ sang, krăo lăng tơlơi ruă. Sit hơmâo tơlơi mưn phrâo pơpă lĕ, lăi pơthâo hăng ƀing nai ia jrao, arăng amra nao pơtô brơi tơl sang, hmao kru. Ơi Ngô Mạnh Cường lăi:

“Abih bang ƀing ƀă laih kman lêng kơ mut anăn hrom grup tơlơi pơhing Zalo, sit ƀuh duăm či kơtang tui, lăi pơthâo tơlơi pơhing grup thâo ñu gêh găl tañ tui anun, anun yơh ta wai lăng tong ten biă. Bơhmutu lu tơlơi pơtă pơtăn, pơkra rup video pơtô brơi hrăm suă jua grup ƀing ƀă klin F0 kơnong hrăm tui anŏ arăng pơtô amăng video anun, anun yơh hơdră pơtô klă hloh ƀu tơguan nao tơl djop sang anŏ pơtô brơi suă jua ôh.

Amăng grup lăng abih bang hlơi pơtŭk, duăm pơiă drơi, tơnap suă pran lĕ jing tơlơi mưn phiăn hơmâo, djop mơnuih duăm hlor, pơtŭk, tơnap suă jua soh anun yơh anăm bơngơ̆t ôh. Ră anai, khom hrăm mă yua boh thâo ia rơgơi, tơdah ƀu hơmâo ôh măi telephôn rơgơi, tơlơi phrâo ia rơgơi anun sit mơ̆n kơđông mơtam”.

Tui hăng ơi ia jrao Võ Minh Hùng, Khua anom bruă ia jrao plơi prong Ƀuôn Ma Thuôt, yap truh mông anai, amăng plơi prong Ƀuôn Ma Thuôt hlăk pơphun bơčlah dŏ, pơjrao mă pơ sang anŏ giăm 7000 čô mơnuih ƀă klin Covid 19. Hơmâo phường đơ đa hơmâo giăm 1000 čô F0 hlăk dŏ pơjrao pơ sang. Mah tui anun, sang ia jrao să, phường hơmâo pơhrua nao laih mơnuih mă bruă ƀing pơyơr pran jua djru hrom samơ̆ mơnuih mă bruă ăt dŏ kơƀah, yua kơ mơnuih ƀă klin jai hrơi lu, bruă mă lu đơi tơl ƀu anăm ngă bruă ôh.

“Ƀuh rơđah tơlơi mơnuih mă bruă mơ̆ng sang ia jrao phường mah hơmâo ƀing pơyơr pran jua ngă hrom samơ̆ kơniă laih mơ̆n, čang rơmang mơnuih ƀôn sang sit hlơi ƀă klin laih jing F0 lĕ lăi pơthâo hăng phường mơtam, ngă tui djơ̆  hơdră 5 k laih anun krăo lăng tơlơi suaih pral ta pô pơ sang.

Sit hơmâo tơlơi hơgĕt thơ, pơblih, mưn phara hloh lăi pơthâo mơtam sang ia jrao să, phường kiăng gơmơi hơmâo hơdră pơtô brơi, ngă tui klă pơgang tơlơi suaih pral kơ mơnuih F0 hlăk dŏ pơjrao pơ sang. Ƀing gơmơi ăt git gai abih bang mơnuih mă bruă gah ia jrao amăng plơi prong djru kah pơpha lăi pơthâo tơlơi pơtô pơgang mă pô kơ ƀing F0 laih anun kiăng kơ ƀing F0 anun djop pô khom pơtruh nao rai hăng mơnuih mă bruă pơ sang ia jrao phường”.

Amai Thủy hlăk pơtô brơi kơ sa čô mơnuih ƀă F0 pơjrao pơ sang anŏ

Yap truh lơ 2/3 plơi prong Ƀuôn Ma Thuôt čih pioh hơmâo 15 rơbâo čô mơnuih ƀă Covid, amăng anun giăm 8.500 čô pơjrao hlao laih, 36 čô mơnuih djai. Plơi prong Ƀuôn Ma Thuôt ăt jing anih hơmâo mrô mơnuih ƀă klin lu hloh ƀơi tơring čar Dak Lak.  

Ƀơi anăp kơ tơlơi pơhing anai, anom bruă ia jrao hơmâo git gai djop sang ia jrao pơyŭ kah hăng sang ia jrao să, phường kơtưn krăo lăng, pel ĕp, pơčrang kman test hmar hơdôm mơnuih hŭi ƀă klin F0 kiăng hơmâo hơdră ƀư̆ pơkra glăi hơdră bong glăi hăng klin amăng plơi pla; ĕp lăng amăng čơđai sang hră gưl muai pơdơi hrăm hră hăng pơdơi jăng jai hrăm pơ sang hră hăng ƀing čơđai sang hră gưl sa, gưl dua, truh pơ gưl klâo, kơnong ƀing čơđai sang hră anih 9 hăng 12 rơnuč gưl ăt nao hrăm pơ sang hă; laih dơ̆ng pơtrut kơtang djru pôr pơthâo, pơtô lăi kơ mơnuih ƀôn sang kơ bruă pơhlôm pơgang klin kah hăng ngă tui khut khăt tơlơi pơtô 5 k.

Kơnong hăng bruă ia jrao, kiăng dưi djop mơnuih mă bruă kơ sang ia jrao pơ să, phường lơ̆m mrô mơnuih ƀă klin lu tui, mrô mơnuih F0 pơjrao pơ sang lu mơ̆n, anom bruă ia jrao plơi prong djru mơnuih mă bruă pơ să phường ƀing nai ia jrao hyu pơjrao tơl sang. Rơđah biă ñu, rĭm kơ sang ia jrao amra pơhrua nao dơ̆ng mơ̆ng 4-6 čô mơnuih djru bruă jing ƀing pơyơr pran jua, ƀing nai ia jrao pơdơi abih thun bruă laih hăng sang ia jrao pơjrao yua mơnuih ƀôn sang ngă pô amăng plơi prong.

Nay Jek: Pơblang