VOV4.Jarai-Thun blan rơgao, plơi prong Ƀuôn Ma Thuôt, tơring čar Dak Lak pơtum ngă bruă ngă tui boh thâo phrâo tơlơi pơhing, anăp nao akŏ pơjing kơnuk kơna mă bruă điện tử. Pơblih mă bruă mă yua ia rơgơi mrô djru pơgôp hrom tŭ yua hloh amăng bruă mơ̆ng kơnuk kơna, kiăng ngă mơak pran jua mơnuih ƀôn sang, anom bruă sĭ mơdrô.

Pơhrua kơ bruă ngă hră pơar nao pơ lu anih, lu sang bruă kĭ hră pơsir bruă mơnuih ƀôn sang kah hăng hlâo adih, ră anai mơnuih ƀôn sang plơi prong Ƀuôn Ma Thuôt juăt laih hăng bruă ngă hră nao pơ sang anih lăi sa bah amăng ƀơi să, phường ƀudah anih tŭ mă hră pơar hăng pơsir truh hrơi brơi glăi hră pơar ngă hră kơ mơnuih ƀôn sang plơi prong Ƀuôn Ma Thuôt ƀơi sang bruă mrô 27 jơlan Trường Chinh, plơi prong Ƀuôn Ma Thuôt. Sa čô nao ngă hră, mă mrô djă ƀơi tơngan, dŏ tơguan truh arăng iâu mrô ta, nao dưm hră pơar arăng čih anăn, pơƀuh amăng rup video pơhaih rơđah rơđong. Mơnuih ƀôn sang ngă hră pơar arăng pơtô brơi hăng čih tơlơi pơhing bruă kiăng ngă hră djơ̆ tơlơi phiăn pơtrun akŏ tlôn.

Boh tơhnal brơi glăi hră pơar kơ mơnuih ƀôn sang čih rơđah hrơi blan nao mă hră pơar, yua kơ anun gêh găl hloh. Ayong Trần Văn Nguyên, mơnuih mă bruă amăng sang bruă prăk dŏ ƀơi phường Thống Nhất, plơi prong Ƀuôn Ma Thuôt, tơring čar Dak Lak lăi:

“Amăng mông klin kheng djơh hăng anai sang bruă prăk ngă hră pơar, yua hơmâo hơdră mă bruă yua plăng internet jing ia rơgơi mrô, anun yơh ngă hră pơar pơhaih tơlơi pơhing hlâo, truh mông nao ngă hră ñu amuñ biă mă, kơnong mă mrô hăng tŭ mă hră pơar yơh”.

Anih tŭ mă hră pơar hăng brơi glăi hră pơar mơnuih ƀôn sang laih pơsir ƀơi anih mă bruă sa bah amăng plơi prong Ƀuôn Ma Thuôt

mă yua măi mok phrâo bơwih brơi kơ mơnuih ƀôn sang

Pơtong rơđah boh thâo ia rơgơi mrô, pơđĭ tui tơlơi mă bruă hmar kiăng lăp djơ̆ pran jua mơnuih ƀôn sang, anom bruă sĭ mơdrô bơwih brơi kơ mơnuih ƀôn sang ngă hră pơar ăt kah hăng ngă tui hơdră man pơdong plơi pla phrâo, plơi prong rơgơi, Ƀuôn Ma Thuôt ƀu pơdơi ôh hơdră pơblih phrâo mă bruă, git gai wai lăng, pok pơhai bruă mă ngă hră pơar kơ mơnuih ƀôn sang. Tơlơi thâo hluh amăng bruă mă phrâo mơ̆ng mơnuih apăn bruă kơnuk kơna, mơnuih ƀôn sang tơpă hloh, djơ̆ lăp, hrơi blan ngă hră pơar tong ten, biă mă ñu lu hră pơar hlâo adih, pơsir kaih, rơgao hrơi blan pơkă, ră anai ngă hmar biă mă.

Amai Ninh Thị Thanh Thảo, mơnuih mă bruă mơ̆ng Anom bruă prăk kăk hăng akŏ bruă plơi prong Ƀuôn Ma Thuôt, Dak Lak brơi thâo:

"Mă yua hnong mă bruă mrô 3,4 mơnuih ƀôn sang kơnong dŏ pơ sang mă bruă online đôč mơ-it tơlơi pơhing hră pơar ta kiăng ngă anun amăng web anih tŭ mă pơar pơsir sa bah amăng, mơnuih apăn bruă mă yua boh thâo ia rơgơi anai tŭ mă tơlơi pơhing hăng pơsir amăng 3 hrơi giong anun lăi glăi boh tơhnal pơsir hră pơar kơ mơnuih ƀôn sang pô ngă hră thâo ƀudah mơ-it boh tơhnal anun tui jơlan sang dăng kông ba brơi kiăng jao kơ mơnuih ƀôn sang tơl sang”.

Tui hăng ơi Vũ Văn Hưng, Khua Jơnum min mơnuih ƀôn sang plơi prong Ƀuôn Ma Thuôt, tơring čar Dak Lak, hơdôm thun rơgao, plơi prong Ƀuôn Ma Thuôt hơmâo pơblih lu hơdră mă bruă, brơi djop anih tŭ mă hră pơar hăng pơsir hră pơar mơnuih ƀôn sang ngă gêh găl kơ mơnuih ƀôn sang amuñ hloh yua hơmâo pơblih yua mrô. Boh tơhnal pơtong glăi mrô pơblih bruă mă tui mrô tơring čar Dak Lak thun 2020 yua kơ Jơnum min mơnuih ƀôn sang pôr, mrô ngă bruă tui hơdră pơblih mrô anai hơmâo 113,66 puang; bơwih ƀong huă mrô 27,15 puang; bruă mơnuih mơnam mrô 46,86 puang jing anih ngă bruă mă yua mrô lu hloh pơkă hăng tơring glông pơkŏn amăng tơring čar. 

Anai lĕ atur pioh kơ gong gai plơi prong ăt tuh pơ alin pơblih pơkra glăi bruă mă yua mrô kiăng djơ̆ tơhnal pơtrun. Ơi Vũ Văn Hưng brơi thâo: Plơi prong Ƀuôn Ma Thuôt ăt ngă tui pơblih bruă mă hăng mrô amăng lu bruă pơkŏn, kiăng bơwih brơi kơ mơnuih ƀôn sang klă hloh, ngă gêh găl kơ anom bruă sĭ mơdrô yua dah pơblih mrô djru pơgôp hrom pơtrut pơđĭ kyar tui bruă mă plơi prong phrâo.

“Gơnam yua mă bruă boh thâo ia rơgơi tơlơi pơhing mơ̆ng plơi prong ră anai hơmâo tuh  pơ alin, blơi djop gơnam yua kiăng lăp hăng bruă mă pơtrun. Glông bruă ngă gêh găl kơ mơnuih ƀôn sang ăt hơmâo ngă tui laih. Biă mă ñu, mă bruă sa anih sa bah amăng mơ̆ng plơi prong hăng mơ̆ng 21 boh să, phường hơmâo blơi djop mă  yua mă bruă hăng boh thâo phrâo ia rơgơi, hơmâo anŏ pơtong lăng mơ̆ng mơnuih ƀôn sang lơ̆m pơsir bruă mă. Hơdră ngă tui anŏ pơblih phrâo truh thun 2025 ƀing gơmơi amra ngă giong hơdră kơnuk kơna mă bruă yua hăng mrô”.

Plơi prong Ƀuôn Ma Thuôt hăng hơdôm boh tơhnal hơmâo pơtong glăi laih, anăp nao akŏ pơdong jing plơi prong phun amăng kual Dap Kơdư, plơi prong Ƀuôn Ma Thuôt iâu pơthưr djop anom bruă ping gah, gong gai kơnuk kơna, mơnuih apăn akŏ khom thâo hruaih amăng bruă mă yua boh thâo ia rơgơi mrô, pơjing rai sa yak mă bruă phrâo tui hơdră điện tử ngă atur mă bruă plơi prong rơgơi; pơđĭ tui tơlơi thâo hluh kơ mơnuih mă bruă, mơnuih apăn bruă, sang bruă kơnuk kơna hăng mơnuih ƀôn sang kơ boh tŭ yua ñu mă yua boh thâo phrâo ia rơgơi wai lăng hăng pơđĭ kyar bơwih ƀong huă mơnuih mơnam.

Hương Lý pô čih-Nay Jek: Pơblang