VOV4.Jarai - Mơguah lơ 24/8, ƀơi plơi prong Buôn Ma Thuột, Jơnum giang mah Việt Nam -Lao tơring čar Dak Lak pơphun mông  bưp ƀô̆ mơta ƀing tơhan hơđăp, ƀing rơgơi kơhnâo đưm hlâo djru bruă pơ dêh čar Lao ƀrô tal hơdor glăi 60 thun hrơi akŏ pơjing bruă pơtom hiăp (5/9/1962-5/9/2022) hăng 45 thun hrơi kĭ pơkôl ngă giang mah, ngă hrŏm kơplah wah Việt Nam - Lao, Lao - Việt Nam. Amăng mông bưp, ƀing tơhan hmư̆ tơlơi pơhiăp mơng Khua git gai Ping gah dêh čar ơi Nguyễn Phú Trọng amăng mông ngă lơphet hơdor glăi 60 thun hrơi akŏ pơjing bruă pơtom hiăp kơplah wah Việt Nam - Lao.

Mông bưp ƀô̆ mơta

Mông pơbưp, hơdor glăi thun blan mă bruă, djru blah wang ƀơi dêh čar Lao, pơdah tơlơi čang rơmang hăng rơkâo hơdôm boh tơhnal bơdjơ̆ nao bruă bruă mơng Jơnum giang mah kah hăng hơdră djru, bruă mă mơng ƀing ding kơna hăng tơhan hơđăp, ƀing rơgơi kơhnâo đưm hlâo djru bruă, blah wang ƀơi dêh čar Lao. Ƀrô tal anai, Jơnum min mơnuih ƀon sang tơring čar Dak Lak ƀơk 100 anung gơnam brơi tơhan hơđăp, ƀing rơgơi kơhnâo đưm hlâo djru bruă ƀơi dêh čar Lao, lĕ sang anŏ tơnap tap, dŏ hơdip hajăn.

Siu Đoan: Pơblang