VOV4.Jarai - Tui hăng Gơnong bruă gru grua - bơkơjăp drơi jăn hăng tuai čuă ngui Dak lăk amăng hrơi pơdơi lơ 30/4 hăng 1/5, tơring čar hơmâo čơkă giăm 56.000 wơ̆t čô tuai rai ngui, pơdơi pơdă, pơhrui glăi giăm 17 klai prăk, đĭ rơbêh 80% pơhmu hăng hrơi pơdơi thun hlâo. Mơnuih mă yua anih đih pơdơi hơmâo rơbêh 90%. Hơdôm anih sĭ mơdrô gơnam ƀong huă, sang jưh tuai lêng tĕp hră čih prăk apah, sĭ djơ̆ nua tui hră tĕp, huăi sĭ pơmă kơ ƀing tuai ôh.

Ƀing tuai nao ngui pơ Ko Tam

Yă Nguyễn Thụy Phương Hiếu, Kơ-iăng khua gơnong bruă gru grua - bơkơjăp drơi jăn hăng tuai čuă ngui Dak Lăk pơsit: “Bruă hyu čuă ngui Dak Lăk hơmâo pơƀuh anŏ dưi gah kông ngăn tơdơi hơmâo gah tuai hyu ngui. Laih anun tơring čar glăk čih pơkra hră pơkôl pơkă mơnuih Dak Lăk pơhiăp tom tuai rai ngui hiư̆m pă kiăng mơ-ak, jê̆ giăm, djă bong kơjăp tơlơi hmư̆ hing mơng pô. Tơring čar amra git gai djŏp anom bruă hrŏm hăng Anom bruă tuai čuă ngui ngă hiư̆m pă mơng akŏ pơjing gơnam bơwih brơi tuai phrâo, ngă phrâo hơdôm gơnam pơkra brơi ƀing tuai. Ăt kah hăng pơđĭ tui anŏ klă pơtô ba mơnuih mă bruă, ngă pơhưč, kĭ hră ngă hrŏm hăng hơdôm boh tơring čar ƀon prong đah mơng pơhưč tuai rai ngui pơ Dak Lăk”.

Siu H’Mai: Pơblang