VOV4.Jarai - Tui hăng mrô čom puang amăng bruă pơplih ngă hră pơ-ar thun 2021, tơring čar Dak Lak hơmâo 86,52 puang, dong tal 36 amăng 63 boh tơring čar, ƀôn prong, đĭ 3,3 puang, pơplih 9 gưl pơhmu hăng thun 2020. Hăng bruă sem lăng tơlơi tŭ ư mơng mơnuih ƀon sang, khul grup hăng bruă djru ngă hră pơ-ar mơng djop anom bruă kơnuk kơna thun 2021, dong tal 59 amăng 63 boh tơring čar, ƀon prong, đĭ 3 wŏt pơhmu hăng thun 2020.

Tui hăng ơi Nguyễn Đình Trung, Ding kơna Ping gah dêh čar, Khua git gai Ping gah tơring čar Dak Lak, mah hơmâo lu tơlơi pơplih phrâo amăng ngă hră pơ-ar samơ̆ kiăng kơ ngă gêh gal hăng ba Dak Lak pơđĭ kyar djơ̆ hăng tơlơi dưi phun amăng kual Dap kơdư, pơ anăp anai, tơring čar tŏ tui pơtrut amăng pơplih ngă hră pơ-ar, kơtưn klă ƀiă dong amăng bruă ngă hră pơ-ar. Dak Lak ba tơbiă hơnong pơkă truh thun 2025, bruă pơplih amăng ngă hră pơ-ar ƀơi tơring čar amra dong amăng grup 20 amăng 63 boh tơring čar, ƀôn prong.

Siu Đoan: Pơblang