VOV4.Jarai - Lơ 7/6, Ping gah tơring čar Dak Lak gum hrŏm hăng Sang hră pơtô bruă kơđi čar dêh čar Hồ Chí Minh pơphun Jơnum bơkơtuai boh thâo hăng anăn “Ping gah tơring čar Dak Lak đing nao pơđĭ kyar ngă hmua hiam hơdjă, hơđong kjăp”. Amăng mông jơnum, ƀing khua mua hơmâo pơčrông sai kơ tơlơi tơnap, tơlơi gal, tơlơi dưi, tơlơi lông, jơlan gah hăng hơdră pơsir kiăng pơđĭ kyar ngă hmua amăng tơring čar Dak Lak tui jơlan hiam hơdjă, hơđong kjăp, pơsir hĭ hơdôm bruă aka ƀu klă mơng pơjing rơnoh gơnam yôm mơng ngă hmua amăng tơring čar ră anai.

Mông jơnum

Tui hăng Ping gah tơring čar Dak Lak, pơđĭ kyar ngă hmua tui jơlan hiam hơdjă, hơđong kjăp lĕ sa amăng 6 bruă jao yôm phun kiăng pơđĭ kyar bơwih ƀong huă amăng tơring čar, hơmâo lăi nao amăng tơlơi pơtrun Jơnum Ping gah tơring čar tal XVII, rơwang thun 2020-2025. Amăng mông jơnum, ƀing khua mua ba tơbiă hơdôm hơdră bruă pơđĭ kyar ngă hmua mă yua boh thâo phrâo hăng mă yua măi mok phrâo, pơhưč tuh pơ alin, ngă tui hơdôm tơlơi dưi amăng rơnuk mă yua boh thâo 4.0 amăng ngă hmua. Mơng anun ngă ha amăng plĕ, pơplih phrâo, ba glăi tơlơi gal brơi Dak Lak pơđĭ kyar ngă hmua klă hloh, hơđong kjăp, ngă tui hơnong pơkă pơđĭ kyar “Ngă hmua hiam hơdjă, ngă hmua pơplih phrâo, ngă hmua thâo rơgơi”.

Siu Đoan: Pơblang