VOV4.Jarai-Tơlơi pơhing mơ̆ng Puih kơđông tơhan pơgang guai dêh čar či Ea Hleo, gah anom bruă tơhan pơgang guai dêh čar tơring čar Dak Lak mơguah lơ 20/3, mơ-it nao ƀing khua mua, ling tơhan ngă hrom djop sang bruă kơnuk kơna djru ană plơi hơmâo tơlơi truh răm ƀăm yua hơjan kơtang kơkruah yâo ngă rai ƀơi să Ia Lôp, tơring glông Ea Sup. Hlâo kơ anun, mơmŏt lơ 18/3, ƀơi plơi Chiềng hăng plơi Đóng, să Ia Lôp, hơmâo hơjan kơtang hăng hơkruah yâo, ngă kơ 10 boh sang mơnuih ƀôn sang ƀơi dua boh plơi  anai răm ƀăm kơtang gah sang dŏ hăng dram gơnam kông ngăn.

2 boh sang hră gưl sa Cầm Bá Thước hăng sang hră gưl muai Hoa Lan ăt pok bơbung yua hơkruah yâo laih anun răm ƀăm gơnam pơkŏn. Tơdơi kơ hơmâo tơlơi truh, Puih kơđông tơhan pơgang guai dêh čar ƀơi Ea Hleo hmao brơi ƀing tơhan nao djru ană plơi, hrom hăng khua mua gong gai kơnuk kơna ƀơi kual plơi pla pioh djru pơđuăi mơnuih ƀôn sang nao dŏ pơ anih rơnuk rơnua. Laih dơ̆ng, nao čuă jơmư, djru juh alum ană plơi, gum pơhrêp pơkra glăi sang, sang hră, kiăng tañ hơđong tơlơi hơdip mơda.

Nay Jek: Pơblang