VOV4.Jarai - Giăm 100 čô hơmâo bruă amăng hrơi nao tơña bruă tal I, thun 2022 hơmnâo pơphun amăng lơ 15/2 ƀơi anom bruă hơduah ĕp bruă mă tơring čar Dak Lak. Amăng hrơi nao tơña bruă hơmâo 11 anih, anom bơwih ƀong sĭ mơdrô mut hrŏm kiăng kơ ruah mơnuih mă bruă hăng mrô 1.773 čô, anai lĕ ƀing mă bruă gah tơkai tơngan.

Anom bruă hơduah ĕp bruă mă tơring čar Dak Lak brơi thâo: Anai lĕ hrơi nao tơña bruă tui tơđar blung a amăng thun 2022 tơdơi kơ hơdôm hrơi pơdơi tết djơ̆ hăng tơlơi kiăng mơng anom bơwih ƀong sĭ mơdrô kah hăng mơng mơnuih mă bruă.

Pơ anăp anai, Anom bruă hơduah ĕp bruă tŏ tui pơphun hơdôm tal nao tơña bruă tui tơlơi pơkă hăng hyu lăi pơthâo djop anih kiăng pơlir hăng hơdôm anom bơwih ƀong sĭ mơdrô amăng tơring čar hăng gah rơngiao tơdah kiăng mơnuih mă bruă amăng tơring čar.

Siu Đoan: Pơblang