Thun 2022, tơlơi bơwih ƀong huă mơnuih mơnam tơring čar Dak Lak hơmâo tŭ mă lu boh tơhnal klă hiam. Prăk duh jia amăng đơ đam tơring čar hơmâo 9.100 klai prăk, lu hloh mơ̆ng hlâo truh ră anai, đĭ hloh 37% pơkă hăng gơnong dlông jao. Anai lĕ boh tơhnal hăng atur pioh kơ tơring čar Dak Lak gir run pơhrui prăk jia kơnuk kơna thun 2023 amăng tơring čar truh 10.000 klai prăk. Tui hăng ơi Bùi Văn Yên, Khua Gơnong bruă prăk kăk tơring čar Dak Lak tơhnal pơkă mă jia 10.000 klai prăk dưi mơ̆n ngă lơ̆m lu kơčăo bruă pơkra ming apui lơtrik hăng jua angin ƀơi Dak Lak pơphun mă bruă sit nik.

Khă tui anun, kiăng dưi ngă tui tơhnal pơkă anai mơ̆ng akŏ thun 2023, abih glông bruă kơđi čar hrom hăng djop sang bruă sĭ mơdrô, mơnuih ƀôn sang gir run prong hloh amăng bruă ngă tui bruă pơtrun, pơsir tơlơi bơwih ƀong huă mơnuih mơnam tui hăng tơlơi klah čun mơ̆ng ping gah tơring čar, Hră pơtrun mơ̆ng jơnum min pơ ala mơnuih ƀôn sang tơring čar hăng hơdôm tơlơi git gai mơ̆ng kơnuk kơna, khua dêh čar.