Pran jua ăt ƀu mơ-ak, dŏ hơ-ưi biă mă lĕ ƀuh ƀơi ƀô̆ mơta yă Lê Thị Linh, dŏ amăng phường Tân Lợi, plơi prong Buôn Ma Thuột, tơring čar Dak Lak hơdôm hrơi anai. Ñu phrâo hơmâo arăng plư hưp ƀong 80 klăk prăk mơng zalo. Ñu brơi thâo, rơbêh ha blan hlâo anun hơmâo nao pơ anom bruă bơdjơ̆ nao plơi prong Buôn Ma Thuột ngă hră pơ-ar pơplih mă yua lŏn mơnai. Mơguah lơ 2/10, hră pơ-ar hơmâo mơ-it nao anom bruă mă jia, jŭ yap prăk kiăng duh. Kiăng gêh gal, ñu rơkâo mơnuih apăn bruă ƀơi anom bruă mă jia anăn T. pel ĕp, djru brơi. Pô anai tŭ ư hăng amra lăi glăi amăng hơdôm hrơi dong. Dua hrơi tơdơi anun, sa mrô zalo iâu rai lăi anăn T. lĕ mơnuih apăn bruă gah anom bruă mă jia rơkâo mơ-it nao 80 klăk prăk, anai lĕ prăk duh hlâo ha bơnah. Hmư̆ tui anun, ñu hơmâo mơ-it nao tui tơlơi rơkâo mơng pô anai mơ̆ ƀu ĕp lăng tong ten. Truh mơguah lơ 6/10, mrô zalo anai iâu mơ-it nao dong 100 klăk prăk. Yua hrơi anai lĕ hrơi tơjuh anom bruă mă jia ƀu mă bruă, anun ñu iâu telephôn kơ mơnuih apăn bruă anăn T., pô anai lăi pơthâo ƀu hơmâo iâu amăng zalo rơkâo mơ-it prăk duh jia ôh. Thâo arăng plư̆, ñu hơmâo lăi pơthâo kông ang. Yă Linh brơi thâo:

“Ăt ƀu thâo lơi yua hơget kâo prap nô̆p jia lŏn hăng thâo anăn pô amra djru kơ bruă duh jia kiăng kơ pơanăn mă pô anai iâu telephôn, laih anun mơ-it rai mrô kak kiăng mơ-it nao prăk. Ƀuh mrô kak anăn T. kâo ăt đăo gơnang mơn hăng ƀu pel ĕp dong tah mơ̆ mơ-it nao prăk mơtăm. Rơkâo kơ ăt nao pơ sang bruă prăk kiăng kơ pel ĕp mơ̆ anăn T. anai djơ̆ hăng anăn mơnuih apăn bruă gah anom mă jia mơn, samơ̆ kơnong phara, hăng sang bruă prăk lăi pơthâo mrô prăk 80 klăk prăk nô̆p jia anai hơmâo mơ-it nao mrô kak pơ dêh čar Kur adih”.

Mơng akŏ thun 2024 truh ră anai, kông ang tơring čar Dak Lak hơmâo ƀom kiơng 25 bruă hưp ƀong kông ngăn amăng plang internet lơm plư mă prăk kak kơ 75 čô mơnuih. Abih tih prăk arăng plư̆ mă truh hơdôm pluh klai prăk. Trung tá Nguyễn Huy Nam-Khua anom wai pơgang pơsuh plang internet hăng pơgang, pơgăn ƀing plư pleč amăng internet tơring čar brơi thâo, hơmâo bruă mă mơng ƀing pô anai lĕ pơanăn mă ƀing apăn bruă gah anom bruă pơsir kơđi anun lĕ: kông ang, ƀing phat kơđi tơlơi, mơnuih mă bruă amăng sang bruă prăk iâu hyu amăng telephôn, zalo, facebook rơkâo mơ-it nao prăk nô̆p phak yua ngă soh tơlơi phiăn jơlan glông, duh prăk ngă căn cước công dân, duh prăk pơjrao, hră pơhlôm nua mơnuih mơnam hăng hơdôm jia pơkŏn dong; jak iâu tuh pơ alin sĭ mơdrô điện tử, prăk điện tử. Hrŏm hăng anun ƀing pô anai ăt klĕ mă anăn facebook, zalo kiăng pơhiăp bit hăng rơkâo čan prăk; pơjing lu web sĭ mơdrô amăng plang internet pơlir hăng bruă plư pleč; ngă gơyut čih tơlơi pơkhăp rơkâo mơ-it prăk kiăng ngă hră pơ-ar nao dŏ hơdip pơ tač rơngiao; brơi čan mă kmlai lu amăng app; ƀơk gơnam rơkâo mơ-it prăk duh pơgiăng mơng tač rơngiao…Trung tá Nguyễn Huy Nam pơhŭi hlâo.

“Rơkâo mơnuih ƀôn sang răng kơđiăng, hơgŏm djop tơlơi pơhing kơ ta pô. Lơm mă yua plang mơnuih mơnam anăm brơi ƀuh tơlơi pơhing kơ ta pô. Lơm ngă bruă hơget bơdjơ̆ nao mơ-it prăk kak kiăng ĕp lăng tong ten. Kiăo tui lăng na nao hăng hơdôm bruă plư pleč amăng plang internet mơng hơdôm anom bruă pôr pơhing kiăng kơ thâo”.

Ơi Trần Thế Việt-Kơ-iăng Khua anom bruă Viettel Dak Lak brơi thâo, bruă pơplih yua boh thâo phrâo pơphun kơtang hloh tui hơnong pơkă pơtrut klă ƀiă, ba glăi tŭ yua amăng mơnuih mơnam; djop bruă mă amăng hơdôm bruă glăk yua boh thâo phrâo, anih djă pioh hră pơ-ar, pơjing anih dưm dăp prong hloh. Samơ̆, kiăo tui anun lĕ ƀing mơnuih ngă soh rơgơi yua dang kông, plang mơnuih mơnam pơphun plư pleč ră anai glăk lu tui. Ƀing pô anai juăt klĕ mă anăn zalo, facebook, viber, tơlơi pơhing kơ ta pô, mă yua sim telephôn ča čot…pơphun lu bruă plư hưp ƀong kông ngăn. Kiăng kơ pla ƀiă ƀuh bruă tui anai amăng telephôn, kiăng lui hĭ sim pơkra ča čot hăng pơjing hơdôm plang pơgăn mă hơjan sim ča čot iâu nao, mơ-it nao tơlơi čih lu wŏt kiăng kơ plư arăng. Ơi Trần Thế Việt brơi thâo:

“Viettel amra gơgrong pel ĕp glăi hơdôm boh sim ča čot mơ-it nao hơdôm anom bruă amăng plơi pla, hơmâo mơnuih mă bruă mơng Viettel glăk hrŏm hăng ƀing ding kơna grup pơplih yua boh thâo phrâo amăng plơi pla lơm pơmut hră pơ-ar amăng VneID hăng sem lăng tong ten sim. Măi krăo lăng mơng Viettel amra kiăo tui lăng hơdôm boh sim juăt iâu hơdôm mrô pơkŏn, Viettel amra mơ-it nao tơlơi pơsit tong, tơdah ta pơtong sit sim ča čot amra pơgăn hĭ mơtăm”.

Ƀơi anăp kơ tơlơi tơnap tap mơng ƀing ngă soh amăng plang internet, rơngiao kơ bruă pơtrut kơtang hơdôm hơdră pơgang, pơgăn mơng anom bruă bơdjơ̆ nao, mơnuih ƀôn sang kiăng răng kơđiăng, ngă tui tơlơi črâo ba mơng kông ang, anăm pơdah brơi tơlơi pơhing ta pô brơi arăng. Mơng anun, djru mơnuih ƀôn sang pơgang, pơgăn hŭi ƀing ngă soh mă tơlơi pơhing kiăng kơ plư pleč hưp mă kông ngăn./.