Ƀơi mông jơnum lok 2, Khul apăn bruă ping gah tơring čar Dak Lak hơmâo pơtum nao pơčrong sai hơdôm tơhnal pơkă, akŏ bruă pơđĭ kyar bơwih ƀong huă mơnuih mơnam, pơhlôm tơlơi rơnuk rơnua dêh čar 6 blan rơnuč thun 2025.

Lăng nao boh tơhnal dưi ngă mơ̆ng mơkrah akŏ thun anai, hơnơ̆ng pơđĭ kyar rơbêh 7%, tơring čar pơkă tơhnal pơđĭ kyar abih sa thun truh 8% pơngŏ, pơhrui glăi prăk duh jia kiăng hơmâo 16.300 klai, rơnoh prăk pơhrui glăi pơkă dưm dưm sa čô sa thun mă bruă truh 80 klăk prăk thun 2025.

Tui hăng ơi Nguyễn Đình Trung, Khua git gai ping gah tơring čar Dak Lak lĕ, kiăng ngă giong tơhnal pơkă, tơring čar khom ngă pơgiong, djop brơi mơnuih apăn bruă amăng gong gai kơnuk kơna dua gưl tui hơdră hơbôt hloh, tŭ yua, sit nik; pơđĭ tui tơlơi thâo git gai wai lăng bruă kơnuk kơna, pơpha bruă mă djop gưl, djop anom bruă; khul grup mơnuih mă bruă khom gơgrong ba dlông hloh tơlơi mă bruă, glăm ba pơčrâo bruă, pok pơhai ngă tui khut khăt djop bruă jao phun yom. Jơnum anai ăt hơmâo pơčrong sai, pơgôp hiăp nao kơ hơdôm boh yom phun prăp lui kơ Jơnum ruah khua ping gah amăng tơring čar Dak Lak, rơwang bruă thun 2025-2030.