Thun hrăm 2024-2025, tal blung a čơđai hrăm anih 12 ngă giong Jơlan hơdră pơtô hrăm thun 2018, hăng hơdôm tơlơi pơplih, mơ̆ng tơlơi hrăm truh kơ jơlan hơdră pơđĭ tui tơlơi pơmin pran jua hăng tơlơi rơgơi mơ̆ng mơnuih hrăm. Ăt amăng thun anai mơn, tal pơplông abih anih 12 hơmâo pơplih kơ tơlơi ba pơplông hăng hơdră pơplông, biă ñu tơlơi pơplông ruah mă tơlơi djơ̆ arăng iâu trắc nghiệm hơmâo pơhrua tui hơdôm tơlơi tơña phrâo, kiăng pơtŏng sit tơlơi rơgơi mơ̆ng ƀing čơđai. Adơi Lê Minh Hưng, hrăm anih 12, Sang hră gưl 3 Buôn Ma Thuột, tơring čar Dak Lăk lăi:“Tơlơi pơplông thun anai hơmâo lu tơlơi pơplih, biă ñu lĕ tơlơi hrăm tum pơƀut. Kâo lăng khŏm hrăm hăng hơdor lui lu tơlơi tơña hloh, kiăng thâo kjăp tơlơi hơmâo hrăm, thâo pơmin mă dong. Mah ƀing nai djru ba lu laih samơ̆ kâo ăt bơngơ̆t mơn yua dah anai lĕ tal pơplông yôm hloh pơsit tơlơi hơdip mơda mă bruă tơdơi anai./”.

Ră anai, hơdôm boh sang hră ƀơi tơring čar Dak Lăk glăk mut amăng hrơi mông pơtô brơi čơđai sang hră anih 12 lu hloh. Ƀing nai pơƀut pơtô glăi, pơtŏp brơi čơđai pơkra tơlơi pơplông tañ, djơ̆ tui hăng tơlơi kiăng phrâo mơ̆ng tơlơi pơplông, djru čơđai hơđong pran mut amăng tal pơplông.

Yă Nguyễn Thị Xuân Hương, Khua sang hră gưl 3 Lê Qúy Đôn, plơi prong Buôn Ma Thuột brơi thâo: Sang hră hơmâo pơphun lu wơ̆t sem lăng, pơtŏng sit, kah pơpha čơđai sang hră kiăo tui tơlơi thâo či pơtô tui grup, plai ƀiă glêh tơnap hăng hơdor tơlơi hrăm klă hloh. Phrâo anai, čơđai sang hră hơmâo pơplông lăng hlâo laih tal pơplông abih anih 12 thun 2025 yua Gơnong bruă pơtô hăng pơjuăt pơphun. Anai jing tơlơi gêh gal kiăng ƀing čơđai juăt hăng tơlơi pơplông, hrơi mông pơplông tui jơlan hơdră pơtô hrăm phrâo:“Pơplông tal anai pơtŏng glăi tơlơi dưi hrăm ăt kah hăng bruă hrăm ƀơi sang hră kiăng sang hră sem lăng pơplih git gai črâo bruă gah tơlơi pơtô hrăm amăng sang hră lăp djơ̆ hloh, dưi ngă mơ̆ng akŏ thun hrăm mơtăm anun jing sa thun hrăm kiăng čơđai sang hră dưi mă ƀang 100% mơtăm, mơ̆ng anun ƀing čơđai dưi mut hrăm pơ sang hră gưl prong mơ̆ gơñu hor”.

Ƀơi hơdôm boh sang hră kual ataih, kual asuek, guai dêh čar - anih hơmâo lu čơđai sang hră djuai ania ƀiă, bruă hơdor glăi tơlơi hrăm hơmâo ngă lăp djơ̆ hăng tơlơi kiăng sit nik. Ơi Nguyễn Phan Anh, Kơ-iăng khua sang hră gưl 3 Lăk, tơring glông Lăk, tơring čar Dak Lăk brơi thâo, lơ̆m ƀiă truh hrơi pơplông baih, rơngiao kơ bruă pơtô kiăng čơđai thâo kjăp tơlơi hrăm, ƀing nai ăt pơhiăp tom, pơtrut pơsur kiăng čơđai hơmâo pran jua. Tui anun, sang hră hơmâo lăng glăi, kah čơđai sang hră tui tơlơi thâo, kiăng hơmâo hơdră hrăm klă ƀiă, djru čơđai hơđong pran jua nao pơplông:“Tơdơi kơ pơplông lăng, sang hră pơtô glăi kơ ƀing čơđai năng ai 4 wơ̆t hrơi tơjuh dong. Him lăng mơ̆ng lơ 20/5 truh lơ 20/6, pơƀut abih bang čơđai hrăm aka ƀu thâo đơi, brơi gơñu hrăm thim 4 wơ̆t hrơi tơjuh dong ƀơi sang hră”.

Tal pơplông abih anih 12 thun 2025, tơring čar Dak Lăk hơmâo giăm 22.000 čô čơđai čih anăn pơplông. Ơi Đỗ Tường Hiệp, Kơ-iăng khua gơnong bruă pơtô hăng pơjuăt tơring čar Dak Lăk brơi thâo, gơnong bruă git gai hơdôm anom bruă pơtô hrăm pơtŏng glăi tơlơi pơplông mơ̆ng thun hlâo, čih pơkra tơlơi hrăm hăng bruă pơtô tơlơi hrăm čih pơplông lăp djơ̆ hăng tơlơi hơmâo sit mơ̆ng rim boh sang hră. Biă ñu lĕ lơ̆m Tơlơi pơtrun Thông tư 29 mơ̆ng Ding jum pơtô hăng pơjuăt hơmâo mă yua, hơdôm boh sang hră hơmâo tơlơi pơtô hrăm aset ƀiă, samơ̆ čơđai rơgơi hloh. Ơi Đỗ Tường Hiệp pơsit, anom bruă pơtô hrăm git gai hơdôm boh sang hră čih anăn čơđai sang hră tơnap tap či djru ba hmao klôn, kiăng hơmâo hơmâo čơđai lui pơplông:“Git gai hơdôm boh sang hră čih pơhrua tui bruă pơtô hrăm amăng sang hră lăp djơ̆ hăng tơlơi hơmâo sit nik mơ̆ng sang hră hăng čơđai sang hră. Lơ̆m hơmâo Thông tư 29, khŏm hơmâo hơdră ngă bruă kiăng hơmâo nai pơtô djŏp, pơtô ba čơđai sang hră ƀu kiăng pơtô hrăm thim ôh. Biă ñu hăng ƀing čơđai pơ kual ataih, mơnuih ƀôn sang djuai ania ƀiă lĕ hơmâo tơlơi gum djru ƀu kơnong gah pran jua, gah bruă hrăm đôč ôh mơ̆ ăt hơmâo djru ba prăk kăk dong kiăng čơđai dưi hrăm hăng pơplông klă hloh”.

Prăp lui tong ten, pơtŏng sit djơ̆ hăng tơlơi rơgơi mơ̆ng rim čô čơđai hăng čih pơkra hơdră pơtô hrăm lăp djơ̆, anom bruă pơtô hăng pơjuăt Dak Lăk glăk gir pơhlôm ba tal pơplông abih anih 12 thun 2025 ƀu kơnong hơmâo boh tŭ yua đôč ôh mơ̆ jing pơtrut pran jua kiăng čơđai dưi mut amăng tal pơplông pơkŏn tơnap hloh dong samơ̆ ăt hơmâo lu tơlơi gêh gal pơ anăp./.