Tlam lơ 15/12, ƀơi Hưng Yên, Khua git gai ping gah ơi Tô Lâm hrŏm hăng ƀing pơ ala mơnuih ƀôn sang dêh čar ƀơi tơring čar anai nao bưp mơnuih ƀôn sang ruah khua ƀơi hơdôm să Kiến Xương, Lê Lợi hăng Quang Lịch, lăi pơthâo boh tơhnal phun mơ̆ng jơnum lok 10, khua mua pơ ala mơnuih ƀôn sang dêh čar tal XV laih anun pơđing hmư̆ tơlơi rơkâo hăng lăi glăi kơ mơnuih ƀôn sang ruah khua tơña. Khua git gai ping gah brơi thâo, tơlơi bơwih ƀong huă mơnuih mơnam amăng dêh čar ta ăt hơđong, rŭ glăi tui laih lơ̆m ƀơi rŏng lŏn tơnah ăt dŏ lu tơlơi rung răng; bruă mă prăp lui jơnum prong ruah khua ping gah dêh čar tal XIV hlăk pok pơhai tơpă, djơ̆ hơdră, him lăng pơphun amăng blan 1 thun pơ anăp.

Kơ bruă pơphun gong gai kơnuk kơna dua gưl ƀơi tơring čar, Khua git gai ping gah pơtrun hiăp brơi pơtrut hmar hloh dăp glăi sang bruă, kông ngăn kơnuk kơna, pơđĭ tui boh tŭ yua tơlơi thâo kơ ƀing apăn bruă  kơnuk kơna ƀơi să, kơtưn pơpha bruă mă tơlơi dưi djơ̆ lăp.

 Ƀrô tal anai, Khua git gai ping gah jao brơi 30 boh măi komputer kơ klâo boh să ƀơi Hưng Yên; nao čuă, ƀơk gơnam kơ sang anŏ tơhan rơka rơkač ơi Nguyễn Trọng Hiếu, mơnuih hơmâo gum pran kơ lŏn ia mă bruă ba gru hlâo amăng kual.