Blan 12 mơ̆ kual gah yŭ tơring čar Lâm Đồng ăt dŏ hơmâo hơjan đôč. Ƀơi jơlan rô nao rai phun mŏng tơring čar kah hăng : jơlan dêh čar mrô 20, 27, 27C, 28, 28B…juăt ƀuh na nao anih lŏn dlưh trun mơ̆ng kriăng čư̆ dlông hăng dlưh trun kriăng amăng čroh gah yŭ hlăk dŏ čuk pơkra glăi. Hrŏm hăng anun, hơdôm tơlơi răm ƀăm yua kơ hơjan ia ling dăo ngă ƀơi lu čư̆ jơlan čun čue Prenn, Mimosa, Dran truh pơ Đại Ninh, Song Pha, Gia Bắc….Yua hơjan hlim, ia tơhroh kơtang lu hrơi blan giăm anai, ƀing tơhan djop sang bruă kơnuk kơna tơring čar Lâm Đồng khom gir run abih pran jua mă bruă hrơi mlma ƀu pơdơi ôh, pơblih nao rai khul grup mă bruă hăng pơpha mông pơdơi ƀơi anih jơlan răm kơtang anun, anih ia lip kiăng pơgang brơi tơlơi rơnuk rơnua kơ mơnuih ƀôn sang huăi nao rai ƀơi jơlan răm.

Ayong Nguyễn Duy Hưng, tơhan plơi să Hiệp Thạnh, tơring čar Lâm Đồng juăt nao ĕp lăng ƀơi anih ia dăo dơlăm ƀơi jơlan 20, jơlan čơlah klâo K’Ren, ñu brơi thâo:

“Ƀing gơmơi dŏ mă bruă re se ƀơi anih jơlan răm anai, kiăng mơnuih ƀôn sang rô nao rai hơđong, pơčrâo brơi jơlan gah či nao, bĕ hĭ anih ia lip dơlăm. Ƀing adơi ayong mă bruă pơpha 2 grup, sa grup dŏ krăp ƀơi akŏ jơlan gah adih hang, sa grup dŏ krăp ƀơi akŏ jơlan gah anai hang ia dăo laih anun pơpha glông, pơčrâo jơlan kơ mơnuih ƀôn sang nao rai kiăng rơnuk rơnua”.

Amăng abih bơyan hơjan hlim, tơhan pơlih jơlan glông gah kông an tơring čar Lâm Đồng mă bruă ƀu hơmâo hrơi pơdơi ôh, ƀu ah gơnah hrơi hăng mlam khom pơčrâo brơi jơlan nao, glông rơdêh găn kiăng rơnuk rơnua. Thiếu tá Nguyễn Duy Hùng, kông an să Đơn Dương, brơi thâo, hơdôm hrơi hơjan ia ling dăo, ƀing khua mua, ling tơhan sang bruă gơñu pơtum abih tơhan mă bruă:

“Kông an să Đơn Dương dăp brơi mơnuih mă bruă phun hăng ƀing tơhan djru bruă amăng kual plơi pla dŏ mă bruă krăp lăng hrơi mlam. Hăng mơnuih ƀôn sang bưp tơlơi tơnap tap, djru ba bruă pơdŭ pơgiăng gơnam tam mơnuih ƀôn sang đuăi mơ̆ng anih hŭi rơhyưt. Ƀơi djop jơlan lĕ, ƀing tơhan pơlih jơlan glông ngă hrŏm kông an să pơpha pơčrâo jơlan nao, rơdêh rô djơ̆ anăp ƀơi anih ia lip kơtang”.

Amăng tal hơjan hlim yap mơ̆ng lơ 16/11 truh lơ 5/12, lu arăt jơlan amăng tơring čar Lâm Đồng hơmâo truh kơ 350 bit anih lŏn tơhlŏm. Ƀơi anŏ či Đà Lạt tơl kơđông hĭ jơlan nao rai ƀơi čư̆ čuen čue Dran, Mimosa, Prenn, rơdêh hlong kơđông abih dua bơnah jơlan ƀu thâo truh nao rai, nao ƀu truh kơdun ƀu thâo, kah hăng ƀơi jơlan nao pơ Sacom Tuyền Lâm, Tà Nung ăt dŏ tơguan rơdêh djơ djrui kơđông ƀơi jơlan. Kiăng rŭ glăi, pơgang tong ten jơlan nao rai hluh gah hruaih lĕ, khua mua tơring čar Lâm Đồng hrŏm hăng djop gơnong bruă ƀơi tơring čar, sem lăng re se jơlan glông nao rai amăng hơdôm hrơi hơmâo hơjan hlim, ia ling dăo, lŏn dlưh tơhlŏm kriăng, iâu pơtum lu tơhan, rơdêh đĭ nao sem lăng tơl anih ƀơi jơlan čun čue juăt hơmâo lŏn dlưh. Ơi Nguyễn Hồng Hải, Kơ-iăng khua Jơnum min mơnuih ƀôn sang tơring čar Lâm Đồng ƀuh ƀô̆ mơta ƀơi anih jơlan tơhlŏm ăt kah hăng ƀơi mông jơnum ječ ameč amăng mlam ñu pơčrâo ngă bruă tum teč, lăi pơthâo anŏ kơƀah, bruă aka ƀu dưi ngă, phun ñu ba truh tơlơi truh lŏn kriăng dlưh hăng tơhlŏm hăng hơdră pơsir:

“Jơlan čư̆ čun čue Prenn ngă giong laih, laih brơi rô nao rai hơmâo dơ̆ng yơh tơlơi. Kơƀah  bruă man pơdong pơnăng gang hĭ lŏn, anun čuah tơhroh đuăi, lê̆ trun rô nao pơyŭ adih. Plăng ia rô pơkra ming anet sir hĭ jơlan ia rô anun sit hơjan ia rô trun ƀơi kriăng gah yŭ kơtang tui. Mơ̆ng tơlơi hơmâo djơh hăng anun, khom pơtong rơđah bruă či pơsir. Pơpha bruă mă wai lăng rim črăn, ring bruă ƀơi anih či hơmâo lŏn dlưh tơhlom kiăng hơmâo hơdră pơhlom hlâo djơ̆ lăp, sem lăng hlâo, amăng mông hơjan hăng tơdơi kơ ia ling dăo”.

Amăng hrơi blan hơjan kơtang ia ling dăo truh, lŏn tơhlŏm hơmâo na nao,  lu anih amăng tơring čar, tơlơi gir run mơ̆ng gong gai kơnuk kơna hăng ƀing tơhan djop sang bruă ƀơi Lâm Đồng hơmâo djru hrŏm pơhlom tơlơi rơnuk rơnua jơlan glông rô nao rai, kiăng mơnuih ƀôn sang amuñ hloh nao rai bơwih ƀong huă, anun mơnuih ƀôn sang bơni biă mă. Ơi Trần Văn Hoàng, sang ñu ƀơi jơlan Nhà Chung, phường Xuân Hương-Đà Lạt, brơi thâo:

“Kâo ƀuh ƀing tơhan pơlih jơlan glông anai, ƀing ling tơhan blah ngă anai, ƀing tơhan plơi pơdjru ba soh pơgang brơi mơnuih ƀôn sang, ƀuh tui anun tloh noh yơh. Ƀing tơhan djop sang bruă, hyu amăng mông adai hơjan hlim, angin rơbŭ mă bruă ba glăi boh tŭ yua, klă biă mă”.

Ơi Hồ Văn Mười, Khua Jơnum min mơnuih ƀôn sang tơring čar Lâm Đồng, lăi pơtong:

“Amăng tal hơjan ia ling dăo phrâo anai, hơmâo na nao tơlơi truh ƀơi lu arăt jơlan. Abih bang amăng glông bruă kơđi čar pơtum nao pơsir tañ hloh, abih bang tơhan kông an, tơhan plơi pơdjru hrŏm. Ƀơi djop jơlan kơđông lĕ khom nao pơsir tañ, kiăng hơmâo jơlan dưi glăi truh pơ Đà Lạt, biă mă ñu jơlan čun čue Mimosa hăng Prenn. Khua mua djop ding jum, anom bruă ƀơi dêh čar ăt bơni mơ̆n tơlơi gir run mơ̆ng djop sang bruă. Jơlan čun čue Mimosa ngă bruă hmar hloh amăng 8 hrơi mơtam, mơ̆ng dưi hluh rơdêh rô nao rai. Ding jum man pơdong hơmâo pơtong rơđah hăng pơsit glăi anŏ thâo rơgơi ming pơkra jơlan ngă klă mơ̆n hlâo kơ brơi rơdêh dưi rô nao rai”.

Amăng hơdôm hrơi hơjan hlim na nao phrâo anai, hơmâo tơlơi gum hrŏm abih bang sa pran jua amăng gong gai kơnuk kơna tơring čar Lâm Đồng laih anun hăng pran jua mă bruă glăm ba khut khăt, ƀu hŭi hrơi hăng mlam ôh, djop tơhan anom bruă kah hăng ƀing tơhan blah ngă, tơhan kông an hơmâo pơhlom brơi dưi rô nao rai hruaih, pơsir tañ tơlơi hơmâo kiăng mơnuih ƀôn sang nao rai hruaih mơak, tơring čar Lâm Đồng ăt hlăk ngă tui hmar, tañ hloh mơ̆n pơsir lu ring bruă pơkŏn laih anun dăp hơdră rơđah rơđong kiăng jơlan dưi rô nao rai hiam klă, kơjăp, hơđong brơi kơ mơnuih ƀôn sang.