Amăng mông jơnum, ƀing Khua pơ ala mơnuih ƀôn sang tơring čar Dak Lak lăi pơthâo brơi mơnuih ƀôn sang boh than yôm phăn amăng jơnum rơgao, amăng anun lăi pơtong lu tơlơi phiăn hăng tơlơi pơtrun hơmâo tŭ yap mă yua; hơdôm hơdră bruă pơprong kơ pơđĭ kyar bơwih ƀong huă-mơnuih mơnam, ngăn drăp kơnuk kơna; hrŏm hăng hơdôm bruă ruah mơnuih apăn bruă hăng lu boh tơhnal bơdjơ̆ nao tơlơi hơdip mơnuih ƀôn sang. Mơnuih ƀôn sang tơring čar Dak Lak pơdah pran jua tŭ ư hăng hơdôm boh tơhnal mơ̆ Khua pơ ala mơnuih ƀôn sang dêh čar hơmâo pơsit; laih dong lăi nao lu tơlơi rơkâo kiăng tŏ tui pơgiong hơdră bruă hăng pơsir hĭ hơdôm bruă sit nik amăng ƀon lan.

Hơdôm boh tơhnal hơmâo mơnuih ƀôn sang Dak Lak đing nao anun lĕ bruă kmơk, anah phun pla, hlô rông ƀu hiam hơmâo lăi pơthâo na nao amăng plang mơnuih mơnam. Mơnuih ƀôn sang čang rơmang djop gơnong bruă bơdjơ̆ nao hruă kjăp wai lăng anih sĭ mơdrô gơnam ngă hmua, pơsir hĭ bruă lăi pơthâo soh glăi hăng pơsir hĭ khut khăt ƀing mơnuih ngă soh.

Hrŏm hăng anun, hơdôm bơdjơ̆ nao tơlơi hơdip mơnuih ƀôn sang pơkŏn ăt hơmâo lu mơnuih ƀôn sang ruah khua ƀơi Dak Lak lăi nao, sit biă ñu hơdôm dơnao pơkŏng ia răm rai kơtang tơdơi kơ hơjan ia ling dăo rơgao. Mơnuih ƀôn sang rơkâo tơring čar tañ pel ĕp, jŭ yap glăi anŏ răm rai hăng kah pơpha ngăn rơnoh pơkra ming, man pơdong glăi hơdôm ring bruă bơdjơ̆ nao.