VOV4.Jarai - Dŏ kơnong hơdôm hrơi dong, giăm 480.000 čô čơđai djop gưl ƀơi tơring čar Dak Lak amra pơphun mut sang hră sit nik thun hrăm 2022-2023. Lơ̆m tơring čar Dak Lak glăk kơƀah 1.260 čô nai pơtô, gơnong bruă pơtô pơjuăt tơring čar hơmâo ngă hăng glăk gơgrong amăng pơjing hơdôm jơlan hơdră kiăng pơhlôm klă hloh bruă pơtô hrăm amăng thun hrăm phrâo anai.

Thun hrăm 2022-2023 anai, Sang hră gưl sa Čư̆ Pui II, să kual ataih Čư̆ Pui, tơring glông Krông Ƀông hơmâo 1.400 čô čơđai kiăo tui anih 1 truh anih 5. Nai Nguyễn Hồng Thuần - Khua sang hră brơi thâo, ră anai sang hră dŏ kơƀah abih tih 8 čô nai pơtô:

“Sang hră hơmâo 27 anih pơtô, tơlơi Angle amra pơtô 4 mông hrăm, yua anun kơƀah 2 čô nai pơtô, bơ gah măi komputơr kơƀah 2 čô nai. Laih rơgao, sang hră hơmâo rơkâo anom bruă pơtô pơjuăt tơring glông hăng hơmâo pơphun jơnum laih dong tŭ ư hăng kơ bruă rơkâo đĭ Anom pơphun bruă, Jơnum min mơnuih ƀon sang tơring glông kiăng kơ rĭm tơlơi hrăm amra ĕp dong 1 čô nai pơtô gah biên chế anun lĕ tơlơi Angle hăng măi komputơr, dŏ kơƀah 2 čô nai dong, yua anun sang hră amra kĭ hră pơkôl mă bruă tui tơđar hăng tơdah dưi pơmut biên chế amra ngă hră pơ-ar mơtăm”.

Tơring čar Dak Lak ră anai dŏ kơƀah rơbêh 670 čô nai pơtô gah sang hră čơđai muai

Tơring glông Krông Bông, ră anai hơmâo 51 boh sang hră mơng sang hră čơđai muai truh gưl dua, hăng 21 rơbâo čô čơđai sang hrăm hră. Ơi Huỳnh Viết Trung - Khua gơnong bruă pơtô pơjuăt tơring glông brơi thâo, gơnong bruă pơtô pơjuăt ră anai dŏ kơƀah 133 čô nai pơtô, amăng anun lu hloh lĕ ƀing nai pơtô brơi čơđai muai, samơ̆ anom bruă hơmâo ngă hăng glăk gơgrong pơjing hơdră bruă kiăng pơhlôm amăng pơtô hrăm lơ̆m ƀing čơđai mut sang hră. Ơi Huỳnh Viết Trung brơi thâo:

“Hăng sang hră čơđai muai, ƀing gơmơi amra hrŏ trun mông pơtô hrăm kiăng pơtrut brơi čơđai tơbiă lu ƀiă dong, hăng mrô 1,5 čô nai pơtô ƀơi anih, mơ̆ ƀu pơpha tui tơlơi pơkă lĕ 2 čô nai pơtô. Bơ hăng sang hră gưl sa, ƀing gơmơi ăt pơhlôm brơi 100% mrô sang hră pơtô măi komputơr, tơlơi Angle tui jơlan hơdră phrâo. Kiăng kơ ngă tui bruă anai, anom bruă amra jak iâu mut hrŏm, dua dong lĕ amra pơƀut glăi mơnuih mă bruă tui biên chế kiăng mă yua abih; hăng hơdră rơnuč lĕ hơdôm boh sang hră anet, anai pơtô măi komputơr, tơlơi Angle kiăng ngă tui djơ̆ amăng bruă pơtô hrăm pơlir hăng djop sang hră kiăng pơhlôm brơi kơ thun hrăm phrâo”.

Bơ ƀơi tơring glông Krông Ƀuk, thun hrăm 2022-2023 thun anai ăt čơkă giăm 14.000 čô čơđai, kiăo tui hrăm hơdôm boh sang hră mơng sang hră čơđai muai truh gưl dua ƀơi 46 boh sang hră. Kar kăi hăng tơring glông Krông Bông, gơnong bruă pơtô pơjuăt tơring glông Krông Ƀuk ăt glăk kơƀah 110 čô nai pơtô. Samơ̆ ƀu hrup hăng Krông Bông, mrô nai dŏ kơƀah ƀơi Krông Ƀuk raih daih amăng tlâo gưl mơng sang hră čơđai muai truh sang hră gưl dua. Amăng anun, sang hră čơđai mua kơƀah lu hloh hăng 58 čô nai, sang hră gưl sa lĕ 38 čô, dŏ glăi 18 čô nai pơtô sang hră gưl dua. Ơi Nguyễn Đình Khả - Khua anom bruă pơtô pơjuăt tơring glông lăi pơthâo kơ akŏ bruă pơtô hrăm mơng gơnong bruă pơtô pơjuăt Krông Buk amăng thun hrăm 2022-2023, lơ̆m glăk kơƀah nai pơtô lu biă mă:

“Anom bruă pơtô pơjuăt pơphô bruă brơi Jơnum min mơnuih ƀon sang tơring glông lĕ bruă pơmut nai pơtô aka ƀu djơ̆ hăng tơlơi kiăng. Pơhmutu hăng sang hră čơđai muai lĕ 2,2 hăng tơlơi kiăng sit nik lĕ 2,0 čô pơtô, ră anai ƀing gơmơi hrŏ trun mơng 1,5 truh 1,6 čô nai pơtô kiăng pơhlôm brơi djop nai pơtô, Sang hră gưl sa lĕ 1,5 , ƀing gơmơi hrŏ trun dŏ 1,3 ƀudah 1,2 đôč. Sang hră gưl dua kơƀah 18 čô, đa tơlơi hrăm rơbêh nai pơtô, đa dŏ kơƀah, tơlơi anai kiăng pơpha glăi kiăng kơ lăp djơ̆”.

Đơ đam tơring čar Dak Lak ră anai dŏ kơƀah 1.260 čô nai pơtô mơng sang hră čơđai muai truh pơ sang hră gưl tlâo

Thun hrăm phrâo anai tơring čar Dak Lak hơmâo 478.180 čô čơđai tui hrăm ƀơi 1.071 boh sang hră mơng sang hră čơđai muai truh sang hră gưl tlâo hăng sang hră pơtô rĭse, sang hră pơtô bruă mă. Ră anai Dak Lak glăk kơƀah 1.260 čô nai pơtô. Ơi Phạm Đăng Khoa - Khua gơnong bruă pơtô pơjuăt Dak Lak brơi thâo:

“Hăng tơring čar Dak Lak glăk dŏ tơguăn hơmâo hră pơtrun ĕp pơhrua nai pơtô mơng Kơnuk kơna. Gơnong bruă pơtô pơjuăt hơmâo pơphô bruă brơi Jơnum min mơnuih ƀon sang tơring čar kah pha chỉ tiêu hơmâo jao pơhrua anun brơi djop ƀon lan dŏ kơƀah lu pơhmutu lĕ: Lak, Krông Bông, Krông Ƀuk, anai lĕ hơdôm tơring glông rin. Bruă pơhrua dong chỉ tiêu gah sang hră čơđai muai. Hơdôm ƀon lan đĭ đăi biă rơkâo gum pơgôp mơng mơnuih mơnam…”.

Hăng pran gơgrong dưm dăp, pơhrua ƀing nai pơtô ƀơi hơdôm boh sang hră, anom bruă pơtô hrăm ăt hơmâo lu hơdră bruă phara lơ̆m glăk kơƀah rơbêh 1.200 tui tơlơi pơkôl pơkă gah biên chế brơi kơ nai pơtô, gơnong bruă pơtô pơjuăt Dak Lak glăk prap lui čơkă ƀing čơđai mut sang hră amăng thun hrăm phrâo anai.

Tuấn Long: Čih

Siu Đoan: Pơblang