VOV4.Jarai - Mơguah lơ 29/5, ƀơi plơi prong Buôn Hồ, Hlăk ai Dak Lăk pơphun bruă mă hlăk ai djru mơnuih ƀon sang bơyan pơdơi prong 2022 hăng lu bruă mă ƀơi 15 boh tơring glông, plơi prong amăng tơring čar Dak Lăk, hơmâo tơlơi gum djru mơng rơbêh 10.000 čô hlăk ai, tơdăm dra amăng tơring čar. Ƀơi mông pơphun nao mă bruă, Khul hlăk ai tơring čar Dak Lăk brơi 150 klăk prăk djru pơsir bruă mă kơ hlăk ai tơdăm dra. Brơi 200 phun pla, 1 ring bruă tŭi rơđah jơlan amăng plơi pla, sang khăp pap, anih brơi čơđai muai ngui ngor hăng djru man pơkra lan sang jơnum plơi pla hăng mrô prăk 370 klăk prăk.

Amai H’Giang Niê, Khua hlăk ai Dak Lăk brơi thâo, hơdôm bruă mă amăng hrơi Hlăk ai djru mơnuih mơnam bơyan pơdơi prong 2022 kiăng pơtrut tui pran jua hur har thâo djru mơnuih mơnam mơng hlăk ai amăng bruă pơđĭ kyar bơwih ƀong - mơnuih mơnam; man pơdong plơi pla phrâo, plơi prong hơdip hiam; pơhlôm djru ba mơnuih tơnap tap, pơgang lŏn ia, biă ñu ƀơi hơdôm anih tơnap tap, kual ataih yaih, ƀơi guai lŏn ia.

Siu H’Mai: Pơblang