Bơyan pơdơi prong thun 2023 anai lĕ tal pơdơi lăp hơdor pioh hăng Huỳnh Tấn Đạt, hrăm anih 5, Sang hră gưl sa Lê Hồng Phong, tơring glông Mdrak, lơm dưi hmâo amĭ ama brơi gum hrŏm tal găn rơgao lăng ngă tơhan polih pơgang apui ƀong ƀơi Anom git gai tơhan polih pơgang pơgăn apui ƀong hăng pơtlaih, djru mơnuih hmâo tơlơi truh Kông ang tơring čar Dak Lak. Amăng tal găn rơgao lăng anai, Đạt dưi đĭ hăng dlông rơdêh prah apui ƀong, dui đing ia čruih apui ƀong hrŏm hăng tơhan polih pơgang apui ƀong hăng pơhrăm hơdôm bôh thâo pruih ia pơdjai apui; tơlơi sat truh lơm apui ƀong.

 “Gum hrom anih pơtô bôh thâo, kâo hmâo hrăm laih hơdră pơtlaih pô mơng anih asăp apui ƀong, hăng hrăm dong lu mơta tơlơi pơkon”.

Ăt gum hrŏm hăng tal găn rơgao lông lăng ngă Tơhan polih pơgang apui ƀong, adơi Nguyễn Ngọc Quỳnh Anh, čơđai hrăm anih 5 Sang hră gưl sa Hoàng Việt, plơi prong Buôn Ma Thuột, pơdah pran jua:

 “Hrơi anai lĕ tal blung a kâo dưi djă đing pruih ia pơdjai apui ƀong, kâo mơ-ak biă. Găn rơgao lăng, kâo hor biă bruă mă mơng ling tơhan pơtlaih apui ƀong”.

Hrŏm hăng hơdôm anih pơtô gah rơgiao, bôh thâo bơyan pơdơi prong, ƀudah pioh čơđai ngui mă pơ̆ sang, hơdôm thun jê̆ hăng anai, hơdôm bôh sang anô̆ hăng sang hră ƀơi Dak Lak hmâo đing nao hloh hăng bruă brơi čơđai gum hrŏm hơdôm bruă mă hăng gah rơngiao kơ mơta tơlơi hrăm kah hăng hơduah ĕp lăng glai klô, gru grua đưm; găn rơgao lăng bruă đang hmua; hơdôm anih pơtô bôh thâo hơdip mơda; tal hrăm mơ̆ng ling tơhan; tơhan ia rơsĭ; tơhan pơgang apui ƀong; anih ngui bơyan pơdơi prong tơlơi Anglê; hơdôm anih pơtô luai, pơtaih, pah blâo mơnŭ, đă bôh lông... Ayong Nguyễn Văn Hiển, ƀơi phường Tân Lập, plơi prong Buôn Ma Thuột, lăi lĕ hơdôm tơlơi găn rơgao tui anun amra djru tŭ yua kơ ƀing čơđai lu biă:

 “Čang rơmang mơng sang anô̆ lĕ pioh ƀing čơđai hmâo anih anom ngui ngor tŭ yua, tal 2 lĕ brơi ƀing čơđai ngă juăt, găn rơgao hăng tŭ mă hơdôm bôh thâo sit nik. Hơdôm bôh thâo sit nik anai amra nao hrŏm hăng ƀing čơđai amăng tơlơi hơdip mơda. Anai sit nik jing jơlan hơdră hmâo yua, djru čơđai găn rơgao hăng brô̆ prong kơjăp drơi jăn pran jua”.

Tơring čar Dak Lak ră anai hmâo năng ai ñu 508.000 čô čơđai, tơlơi kiăng gum hrŏm hơdôm anih pơtô bôh thâo amăng tal bơyan pơdơi prong lĕ prong biă. Yă Nguyễn Thị Thúy Hiền, Kơ-iăng Khua Sang jơnum bôh thâo tơdăm dra, tơdăm ngek dra muai čơđai muai tơring čar Dak Lak (gah Khul hlăk ai Dak Lak) brơi thâo, jai hrơi hmâo lu amĭ ama čơđai rơkâo brơi ană gum hrŏm hơdôm bruă hrăm bôh thâo amăng tơlơi hơdip rim hrơi, bôh thâo adôh suang, bơkơjăp drơi jăn; găn rơgao lăng ngă ling tơhan, tơhan pơtlaih apui ƀong, ling tơhan ia rơsĭ. Djơ̆ hăng tơlơi kiăng anun, bơyan pơdơi prong thun 2023 anai, anom hmâo pơphun rơbêh kơ 100 bôh anih hrăm djop mơta hăng ngă pơhưč giăm truh 5.000 wot čô čơđai ƀơi plơi prong Buôn Ma Thuột, hơdôm bôh tơring glông jum dar kah hăng Buôn Đôn, Čư̆ Mgar, Krông Pač... Tui hăng yă Hiền, mơ̆ng ră anai truh kơ abih bơyan pơdơi prong, amra hmâo dong lu bruă mă tŭ yua pioh kơ čơđai muai ƀơi hơdôm bôh tơring glông amăng đơ đam tơring čar:

 “Prăp lui kơ hơdôm bruă mă bơyan pơdơi prong thun 2023, Khul hlăk ai tơring čar hmâo pok pơhai hơdôm jơlan hơdră bruă mă bơyan pơdơi prong kơ hơdôm khul hlăk ai tơring glông, plơi prong pioh pơphun hơdôm jơlan hơdră anih hrăm bơyan pơdơi prong mơtah kơ abih bang ƀing čơđai ƀơi tơring čar Dak Lak. Tui tơlơi lăng tui mơng ƀing gơmơi hăng hmâo lăng ƀuh, lu anom hmâo pơphun hơdôm anih hrăm, jơlan hơdră bơyan pơdơi prong kơ ƀing čơđai gum hrom găn rơgao lăp djơ̆ hăng hnưr thun hăng tơlơi kiăng mơ̆ng ƀing čơđai, hăng tơlơi sit nik ƀơi rim anom. Rơđah biă ñu, hơdôm Khul hlăk ai  tơring glông Krông Ana, Krông Pač ƀudah plơi prong Buôn Hồ hmâo pơphun hơdôm jơlan hơdră sit nik kơ ƀing čơđai hrăm luai ƀu rơngiă prăk, hrăm bôh thâo adôh suang, pơphun hơdôm jơlan hơdră ngui ngor gah rơngiao mơta tơlơi hrăm kơ ƀing čơđai muai...”./.