Brơi hră pơsit hăng brơi bơnga bơni hơ-ơč kơ ơi Nguyễn Minh Huấn hơmâo ruah ngă bruă phrâo, ơi Võ Văn Cảnh, Kơ-iăng khua Jơnum min mơnuih ƀôn sang tơring čar Dak Lăk lăi: Kông ngăn - Ayuh hyiăng jing bruă prong, tơnap tap. yua hnun, lơ̆m ngă Khua gơnong bruă anai kiăng pơtrut tui tơlơi pơmin pran jua ngă bruă, gir na nao, hyu ĕp, hrăm tui hăng gơgrong bruă hloh đah mơ̆ng dưi ngă djŏp bruă hơmâo jao, akŏ pơdong anom bruă jai hrơi đĭ kyar.

Pơhiăp ƀơi mông đĭ ngă khua, ơi Nguyễn Minh Huấn hok mơ-ak lơ̆m hơmâo khua tơring čar đăo gơnang, jao bruă phrâo. Hăng bruă phrâo, hơmâo lu tơlơi tơnap tap, gleh glar, Khua phrâo gơnong bruă kông ngăn hăng ayuh hyiăng ƀuăn amra hrăm na nao, pơđĭ kơjăp pran jua, tơlơi rơgơi bruă kơđi čar, gơgrong bruă, thâo kơjăp bruă mă; pơtruh nao rai hăng abih bang mơnuih amăng anom bruă đah mơ̆ng dưi ngă truh kih bruă hơmâo jao.