VOV4.Jarai - Amăng hrơi Tê̆t Nhâm Dần 2022, Jơnum min mơnuih ƀon sang tơring čar Dak Lăk pơsit brơi rơbêh 49 klai 500 klăk prăk nao čuă jơmư, brơi gơnam kơ mơnuih mơnam, khul grup, hơmâo lu hloh giăm 7 klai prăk pơhmu kơ thun hlâo. Tui anun, mrô prăk brơi kơ hơjăn pô lĕ 300.000 prăk/sa čô; prăk brơi kơ sang anŏ kơnuk kơna juăt djru, mơnuih hơkrŭ lŏn ia lĕ 400.000 prăk/sa čô; prăk brơi kơ sang anŏ ngă bruă rơgơi djru kơnuk kơna lĕ 500.000 prăk/sa čô; prăk brơi kơ ƀing juăt ƀong prăk djru rim blan lĕ 1.300.000 prăk/sa čô.

Khua mua tơring čar Dak Lăk brơi gơnam tê̆t kơ mơnuih ƀon sang să Bông Krang, tơring glông Lăk.

Hrŏm hăng anun, Jơnum min mơnuih ƀon sang tơring čar brơi gơnam Tê̆t hơmâo nua mơng 2.500.000 prăk - 6.500.000 prăk kơ 407 anom bruă kah hăng: Anom bruă Tơhan, Kông an, Tơhan pơgang guai, hơdôm anom bruă bơwih brơi mơnuih ƀon sang amăng tơring čar hăng sa dua anom bruă gah rơngiao tơring čar. 

Siu H’Mai: Pơblang