VOV4.Jarai - Lơ 26/7, Anom bruă git gai tơring čar Dak Lăk kơ bruă hyu ĕp, kuăi pơƀut hăng pơsit anăn tơhan djai pơsăn drơi hơmâo pơphun Jơnum pơčrông sai bruă hyu ĕp, rŭ tơlang tơhan djai pơsăn drơi hăng ƀing kơhnâo dêh čar Việt Nam djai amăng rơnuk blah ngă ƀơi dêh čar Kur, bơyan phang 2021-2022. Tui hăng tơlơi lăi pơthâo glăi ƀơi mông jơnum, tơdơi kơ rơbêh 4 blan ba nao tơhan pơ tơring čar Mondulkiri (dêh čar Kur), ƀing khua, ling tơhan Grup K51 hơmâo hyu ĕp, rŭ đĭ 15 per tơlang tơhan aka ƀu thâo krăn pô hlơi ôh, amăng anun hơmâo 1 mơta gơnam lĕ gai čih kim tinh hơmâo kač boh hră (Ngọc Chút 27-9-66). Amăng hrơi rŭ đĭ tơlang, Grup K51 hơmâo rŭ djom rơnang, pơsit djơ̆ hơdôm mơta gơnam mơng Ling tơhan Việt Nam, laih dong mă pơčrang tơlang tơleh jao kơ Gơnong bruă Mơnuih mă bruă - Tơhan rơka hăng Mơnuih mơnam tơring čar djơ̆ tui tơlơi phiăn. Tơdơi kơ ba glăi 15 tơlang tơhan, Ping gah, Jơnum min mơnuih ƀon sang tơring čar Dak Lăk hơmâo pơphun ngă yang jôk atâo, ba dor tơlang 15 čô tơhan amăng Pơsat tơhan tơring čar.

Ƀing hlăk ai nao tŭi apui hlin hăng ñang ƀơi hơdôm boh pơsat tơhan.

Ƀơi mông jơnum, Jơnum min mơnuih ƀon sang tơring čar Dak Lăk ăt tŭ ư hrŏm bruă mă, ăt pơphun dong mơn bruă hyu ĕp, rŭ tơlang tơhan hăng ƀing kơhnâo Việt Nam djai amăng rơnuk blah wang djru dêh čar Kur.

Siu H’Mai: Pơblang