Hơdôm hrơi anai yă H’ Juaih Mlô (Amĭ Oanh); ƀơi ƀuôn Pưk Prong, să Ea Ning, tơring glông Čư̆ Kuiñ, tơring čar Dak Lak, gun bruă mơng mơguah, prăp lui gơnam tơnă hơbai kơ khul mă bruă dô̆ gak ƀơi rơnuč plơi. Gơnam ƀong phun lĕ gong gai ba nao, gơnam pơƀâo, pơhăng lĕ neh wa plĕ nao. Gum hrom tơnă hơbai hmâo lu čơđai anet amăng sang, amăng ƀuôn, anun hơdôm asơi huă añăm ƀong leng kơ pơhlôm pơđao lom ba truh pơ̆ anih dô̆ gak. Anai lĕ pran jua mơng neh wa amăng ƀuôn, pơsur pran jua mơnuih apăn bruă tơhan, tơhan glăk mă bruă pơgang rơnuk rơnua hơdôm hrơi rơgao.

 “Dô̆ ƀơi lŏn pha brơi abih bang hơdôm gơnam anai, laih anun lĕ neh wa ăt djru mơn ƀơƀiă hơdôm gơnam ƀong anai pioh tơñă hơbai, kiăng djru brơi, pơsur pran jua abih bang adơi ayong khul tơhan plơi ăt kah hăng kông ang amăng ƀuôn, pơsur pran jua kiăng pơgang, wai lăng hơđong kơ plơi pla ăt kah hăng să pô kiăng hơđong”.

Ƀu djơ̆ kơnong kơ sang H Juaih ôh mơ̆, lu sang anô̆ pơkon amăng să Ea Ning ăt hmâo rơkâo mơn hăng gong gai plơi pla pioh tơnă hơbai brơi, djru kơ khul pơgang rơnuk rơnua ƀơi tơring glông Čư̆ Kuiñ. Amai Nguyễn Thị Nhị, Khua Khul pơlir hơbit đah kơmơi să Ea Ning brơi thâo, khul đah kơmơi hmâo pok pơhai laih kiăng adơi amai djru gơnam tam hăng pran jua pioh hmâo mông ƀong huă djop mơnong bơbuă, pơhlôm tơlơi suaih pral hăng pran kơdŏng blah kơ ƀing apăn bruă tơhan, tơhan glăk mă bruă jao. Hơdôm hrơi rơgao, hmâo laih hơdôm rơtuh anung asơi, gơnam ƀong ngui dưi hmâo mơnuih ƀôn sang prăp brơi hăng ba nao pơ̆ Sang să pioh ba nao pơ̆ anih dô̆ gak.

“Ƀing adơi amai ƀơi hơdôm khul grŭp plơi pla hur har pran jua biă, djru pran, djru bruă, djru ƀơƀiă kiăng hmâo asơi añăm ia mơñum. Rơngiao kơ djru tơnă hơbai hmâo sa dua čô adơi amai ăt gum hrom mơn hăng khul tơhan plơi ƀơi sa dua anih anom plơi pla. Kah hăng abih bang ƀơi hơdôm khul gơñu hmâo hơget lĕ gơñu ba nao anô̆ anun pơ̆ sang să, mơnuih hmâo braih, mơnuih hmâo añăm pơtăm, hơbơi pơtơi, wot prăk pioh djru. Amăng hơdôm hrơi rơgao lĕ tơnă hơbai năng ai ñu 500 anung asơi. Rơngiao hơdôm anih dô̆ gak mơng să lĕ dô̆ kơtưn pơkiăo nao ƀing tơhan mơng tơring glông ăt kah hăng mơng tơring čar nao pơ̆ să”.

Tơdơi kơ hmâo tơlơi ƀơi tơring glông, mơnuih ƀôn sang leng kơ ƀom đĭ tơlơi rung răng anun, ngă soh prong tơlơi phiăn pơkă mơng ƀing kơsung blah anun, gơñu ăt gum hrom lăi pơthâo tơdruă pơđĭ tui tơlơi kơđiăng, gum hrom hơbit hăng gong gai hăng khul kông ang wai lăng kơjăp hơđong plơi pla hăng čang rơmang tañ pơwot glăi kah hăng hlâo adih. Ƀơi rim plơi pla, ƀu hmâo hlơi lăi kơ hlơi ôh leng kơ gơgrong hlâo răng kơđiăng, gum hrom hăng khul kông ang pơgang pơgăn, hmao tlôn lăi pơhing lom hmâo ƀing hlơi ƀu ƀuh djơ̆ mơng hlâo ƀơi plơi pla pô. Ơi Nguyễn Thừa Đức, ƀơi thôn 22, să Ea Ning, tơring glông Čư̆ Kuiñ brơi thâo:

“Rơngiao kơ bruă lăi pơhing, pơsur mơnuih ƀôn sang lĕ drơi pô kâo ăt hmâo gum hơgôp mơn ƀơƀiă kiăng kơ huăi gah rơngiao kơ bôh than lĕ gum hrom hăng khul kông ang, tơhan plơi hăng amăng glông bruă kơđi čar kiăng gum pran hrom hyu huĕt mă ƀing ngă soh, ngă giong bruă jao pơgang rơnuk rơnua hơđong ƀơi tơring glông klă”.

Khă kơnong kơ hơdôm gơnam ƀong ngui ƀudah hơdôm get ia mơñum, anung ƀañ, samơ̆ rim mơnuih ƀôn sang leng kơ mơ-ĭt amăng anun hơdôm pran jua tơpă sit, pơsur mơnuih apăn bruă, mơnuih mă bruă tơhan glăk dô̆ mă bruă. Amai H’ Nalin Mlô, ƀơi ƀuôn Pưk Prong, să Ea Ning, tơring glông Čư̆ Kuiñ pơdah pran jua.

“Neh wa mơnuih ƀôn sang amăng plơi ră anai gum hrom hơbit laih, hmư̆ tui hơdră bruă tơlơi phiăn mơng kơnuk kơna, bơwih brơi tơlơi bơwih ƀong sang anô̆. Tơdah hmâo thâo ƀing đing đăo lĕ lăi pơthâo hăng ƀirô kơnuk kơna kiăng gum hrom mă bruă, pơgang rơnuk rơnua lŏn ia amăng plơi pla”.

Tơdah lăi djơ̆ mơn tơlơi pơtŏng sit pran ngă tui khut khăt huy huĕt mă, kơdŏng glăi hăng lu bruă mă hmao tlôn hăng ba glăi bôh tơhnal, kơnong hmâo mă ƀiă, tơlơi hơđong pơwot glăi laih ƀơi hơdôm bôh plơi pla ƀơi să Ea Tiêu, să Ea Ktur. Ăt kah hăng mơng pran đăo gơnang anun hmâo djru mơnuih ƀôn sang gum tơngan hrom khul kông ang hyu hơduah mă ƀing ngă soh, jing pô gơgrong gah tlôn kơjăp lom ba hơdôm anung asơi hơdor tơngia truh hăng khul pơgang dô̆ gak ƀudah gum tơngan hrom, gum hơgôp, djru sang anô̆ mơnuih apăn bruă tơhan, tơhan, mơnuih ƀôn sang hmâo tơlơi truh amăng kơđi tơlơi anun./.