Tal pơplông anai yua kơ phun kông ty apui lơtrik kual Tong krah jak iâu mơ̆ng blan 12/2023 truh blan 3/2024 ƀơi 13 boh tơring čar, ƀôn prong amăng kual Tong krah hăng Dap Kơdư. Amăng mrô rơbêh 58.000 tơlơi pơplông lăi nao 3 mơta bruă ( kač rup, video pơblang glăi hăng video hyu pôr pơtô lăi), ƀơi tơring čar Dak Lak hơmâo 10.100 mơta tơlơi pơplông.

Boh tơhnal tŭ mă 2 pri apah bơni yôm. Rơđah biă ñu, amôn Vi Thị Thu Hà, hrăm anih 5A, Anom bruă pơtô hrăm hăng lăng ba čơđai ƀu klă drơi jăn tơring čar Dak Lak mă pri mrô Dua, ƀing amôn Ngô Bảo Nam hăng Nguyễn Gia Hân, sang hră gưl sa Lê Lợi, tơring glông Čư̆ Mgar tŭ mă pri pơsur pran jua, hrŏm hăng rup video pơblang glăi. Hrŏm hăng dua pri apah bơni anai mơ̆ng Phun kông ty apui lơtrik kual Tong krah hăng Dap Kơdư, Sang bruă apui lơtrik tơring čar Dak Lak ăt hơmâo apah bơni kơ dua grup čơđai sang hră hơmâo mă pri anai.