Amăng dua hrơi lơ 1 hăng lơ 2/12, Ping gah tơring čar Dak Lak jơnum khua mua apăn bruă ping gah tơring čar lok 16 pok pơhư prong brơi pơgôp hiăp kơ boh yôm phun ngă tui bruă mă thun 2022, anăp či mă bruă amăng thun 2023; bruă mă hơduah ĕp, krăo lăng hăng ngă tui tơlơi tơpă amăng bruă amăng ping gah; Pơkă hnong tơring čar Dak Lak mơ̆ng thun 2021-2030, lăng nao pơ thun 2050 hăng čih ming pơkra glăi, pơhrua nao dơ̆ng tơlơi phiăn pơkă bruă mă mơ̆ng khua mua apăn bruă ping gah tơring čar tal XVII, rơwang bruă thun 2020-2025.

Pơhiăp ƀơi mông jơnum, ơi Nguyễn Đình Trung, ding kơna apăn bruă ping gah dêh čar, Khua git gai ping gah tơring čar Dak Lak rơkâo, djop sang bruă ping gah amăng tơring čar, tơring glông khom lăng tơpă, thâo hluh tong ten tơlơi aka ƀu djơ̆, kơƀah pioh pơsir. Laih dơ̆ng, kiăo tui bruă mă pơtrun yôm phun kiăng pok pơhai ngă tui djơ̆ tơlơi pơtrun jơnum hơmâo tŭ ư laih. Amăng anun, pơtum kơ bruă ngă tui Hră pơtrun 23 mơ̆ng Ding jum kơđi čar pơđĭ kyar kual Dap Kơdư, hră pơtrun lông ngă lăng pơkra hơdră phara kơ plơi prong Ƀuôn Ma Thuôt, pok pơhai kơčăo bruă phun amăng tơring čar, ngă tui bruă mă gong gai kơnuk kơna yua mrô, plơi prong phrâo rơgơi, pơsir hĭ tơlơi pơdơi hĭ mă yua rơnoh prăk tuh pơ alin kơ bruă čar.