VOV4.Jarai - Tlam (15/6), Ping gah tơring čar Dak Lak pơphun Jơnum lăng glăi ngă tui tơlơi pơtrun mrô 10/2002 mơng Ding jum kơđi čar amăng pơđĭ kyar bơwih ƀong huă-mơnuih mơnam, pơplôm hơđong amăng kual Dap kơdư rơwang thun 2001-2010 hăng tơlơi pơsit mrô 12/2011 mơng Ding jum kơđi čar tal XI kơ bruă ngă tui tơlơi pơtrun mrô 10/2022 mơng Ding jum kơđi čar (tal IX) pơđĭ kyar kual Dap kơdư rơwang thun 2011-2020. Tui lăi pơthâo amăng jơnum, rơwang thun 2001-2020, bơwih ƀong huă amăng tơring čar Dak Lak đĭ giăm 14%; bruă bơwih ƀong huă đĭ giăm 11 wŏt, mơng rơbêh 5.600 klai prăk thun 2002 đĭ 61.800 klai prăk amăng thun 2020.

Pơhrui rĭm akŏ mơnuih amăng tơring čar ăt đĭ tui, thun 2020 giăm 54 klăk prăk čô/thun, đĭ giăm 18 wŏt pơhmu hăng thun 2002. Mrô sang anŏ ƀun rin rơwang thun 2016-2020 dŏ 6,3% amăng rơnuč thun 2021. Tơlơi hơdip mơda kơ mơnuih ƀon sang jai hrơi hrưn đĭ pơplih phrâo. Pơđut mông jơnum, Ping gah tơring čar Dak Lak rơkâo djop gưl Ping gah, gong gai ƀon lan tŏ tui pran gơgrong, tơlơi thâo thăi, pơgôp hiăp, rơkâo đĭ kiăng pơgôp ngă pơgiong amăng hră lăi pơthâo mơ-it Kơnuk kơna mơng anun amra hơmâo tơlơi pơtrun phrâo, ngă gêh gal, pơtrut pơsur pơđĭ kyar kual Dap kơdư pơ anăp anai.

Siu Đoan: Pơblang