Boh yom phun dưi đing nao lu hloh lĕ bruă tŭ mă prăk tuh pơ alin kơ bruă čar, čuk pơkra jơlan răm, bruă duh glăi lŏn pơklaih ala pioh ngă tui kơčăo bruă phun, bruă pơhrui prăk hrăm hră mơ̆ng akŏ thun hrăm, hrŏm hăng bruă wai lăng anih pơjrao hăng pla tơgơi.

Lăi glăi hăng ƀing čih tơlơi pơhing Gong phun jua pơhiăp Việt Nam, ơi Trương Công Thái, Kơ-iăng khua jơnum min mơnuih ƀôn sang tơring čar brơi thâo, thun 2025 Dak Lak hơmâo rơnoh prăk pơpha brơi 16 rơbâo klai, samơ̆ truh rơnuč blan 8 kiah mă yua aka truh mơ̆n 40%. Tơring čar hơmâo ngă hră pơtrun brơi čih pơkra glăi, pơtrun hiăp djop sang bruă tañ ngă giong hră pơar, kiăng dưi mă yua rơnoh prăk djơ̆ rơnoh pơkă amăng sa thun. Jơnum min mơnuih ƀôn sang tơring čar lăi pơtong, amra ngă tui khut khăt hloh, git gai kiăng pơtrut tañ bruă ngă, dưi ngă giong pơđĭ kyar bơwih ƀong huă kơ mơnuih mơnam.