VOV4.Jarai - Bơdjơ̆ nao bruă phă glai Pơmu ƀơi kual glai 1219 gah đang glai yua Kông ti TNHH sa ding kơna Lâm nghiệp Krông Bông wai lăng mơ̆ anom bruă VOV pôr pơthâo, sa čô khua Gơnong bruă hmua hăng pơđĭ kyar ƀon lan tơring čar Dak Lăk brơi thâo, anom bruă hơmâo lăi pơthâo laih kơ Jơnum min mơnuih ƀon sang tơring čar laih anun glăk tơguan git gai pơsir bruă. Tui hăng pô anai, amăng thun blan rơgao, Kông ti TNHH sa ding kơna wai lăng glai Krông Bông hơmâo jao wai lăng glai samơ̆ aka ƀu mă bruă klă ôh, pơsir bruă ƀu tơl tơhnal, ƀu rơ-oa ôh amăng bruă hyu tir amăng glai, pơgăn arăng ngă soh, phă prai glai rưng ƀing gơñu wai lăng; pioh hơmâo bruă arăng koh drôm kyâo amăng lu thun.

Yua hnun, gơnong bruă hmua hăng pơđĭ kyar ƀon lan tơring čar kiăng Kông ti TNHH sa ding kơna wai lăng đang glai Krông Bông lăng glăi tơlơi soh, kiăng pô khua, mơnuih amăng anom bruă gơgrong pơsir bruă anai. Bruă jăm ƀuah, ñim glăi tơlơi soh khŏm hơmâo ngă laih anun mơ-it nao kơ Jơnum min mơnuih ƀon sang tơring čar Dak Lăk hlâo lơ 4/3.

Siu H’Mai: Pơblang