VOV4.Jarai - Amăng rơbêh 1 blan laih rơgao, drah pioh jur hăng pơjrao brơi mơnuih ruă ruă amăng tơring čar Dak Lak lêng dŏ kơƀah yua kơ drah pioh lui mă yua ƀơi anom bruă ia jrao ƀiă abih laih, lơ̆m anun akŏ bruă tŭ mă drah arăng pơyơr aka ƀu pơphun ôh. Tui hăng tơlơi lăi pơthâo mơng Khul git gai pơsur pơyơr drah tơring čar Dak Lak, amăng blan 3 hăng akŏ blan 4, bruă kơƀah drah jur hăng pơjrao brơi mơnuih ruă kă ngă tơnap tap.

Ƀơi sang ia jrao prong kual Dap kơdư, rĭm blan kiăng mơng 1.800 - 2.000 anung drah kiăng kơ jôr pơjrao brơi mơnuih ruă samơ̆ ră anai hơmâo kơnong ha mơkrah drah tui tơlơi kiăng. Ơi Nguyễn Đức Phú, Khua Khul git gai pơsur pơyơr drah tơring čar Dak Lak brơi thâo: Ră anai, Khul git gai hơmâo pơsur nao pơyơr drah tơring čar hơmâo hră pơ-ar mơ-it jơnum min mơnuih ƀon sang tơring čar rơkâo gơnong bruă ia jrao pơhrua hmao tlôn hơdôm ia jrao kiăng kơ tañ pok pơhai akŏ bruă tŭ mă drah pơyơr, lu tui drah mă yua ƀơi hơdôm sang ia jrao amăng tơring čar.

Siu Đoan: Pơblang