VOV.Jarai-Mơ̆ng akŏ thun truh ră anai, kơƀah mơnuih mă bruă kơhnăk amăng lu kông ty, anom bruă ƀơi tơring čar Dak Lak lu biă mă. Lu anom bruă hơmâo hơdôm rơtuh čô mơnuih mă bruă, lơ̆m anun, kơƀah mơnuih arăng kiăng mă bruă djơ̆ hăng anŏ kiăng lu biă mă. Kơƀah mơnuih mă bruă kơtang anai lĕ ngă bơbeč truh kơ bruă pok pơhư prong bruă mă, pơkra ming gơnam sĭ mơdrô.

Hơdôm blan rơgao, anom bruă pơkra ming pơhrôp blâo mơta hăng tơčoh sum ao Hà Thư, amăng anih tuh tia pơkra ming sa ƀut Tân An, tơring čar Dak Lak kơƀah mơnuih mă bruă lu biă mă. Yă Nguyễn Thị Trang, pô sang bruă brơi thâo, ñu kiăng iâu pơmut 800 čô mơnuih mă bruă thâo bruă, kơhnăk pơkra ming, mah pôr pơthâo lu plang tơlơi pơhing iâu mơnuih mă bruă samơ̆ kiah hơmâo 200 čô mơnuih đôč. Ƀu djop mơnuih mă bruă, anom bruă sang bruă sĭ mơdrô pok ƀiă đôč, du bla, bơbeč prong biă mă kơ akŏ bruă pơkă hlâo mơ̆ng akŏ thun.

“Ta ăt čih pôr laih amăng plang tơlơi pơhing kiăng ĕp mơnuih mă bruă samơ̆ mrô mơnuih kông ñơn rai mă bruă rơkâo bruă ƀiă đơi. Ƀing thâo hruaih amăng brmă uă  glăi pơdơi yua klin hlâo kơ anai, rai mă bruă glăi sa dua blan gơñu pơwơ̆t glăi pơ Bình Dương, Đồng Nai  adih yơh, gơñu ƀu dŏ glăi mă bruă hăng ta ôh. Ƀing hlăk dŏ mă bruă tơdah truh bơyan pĕ tiu, bơyan pĕ kơphê lĕ gơñu pơdơi pioh nao hmua gơñu, ƀing pơdơi laih ƀu hơmâo pô pơwơ̆t glăi mă bruă dơ̆ng ôh”.

 Lu sang bruă sĭ mơdrô ƀơi Dak Lak hlăk kơƀah mơnuih mă bruă kơhnăk

Kah hăng tơlơi yă Trang anun mơ̆n, ơi Nguyễn Kim Tùng-Kơ-iăng Khua kông ty TNNHH pơkra ming sĭ mơdrô hăng man pơdong Tùng Bách brơi thâo, kông ty ñu ăt pok pơhư prong bruă mă, tăp năng mă bruă aka djop hnong pơkă ôh yua kơƀah mơnuih mă bruă kơhnăk.

"Mơ̆ng akŏ thun truh ră anai kông ty kiăng hơmâo 50 čô mơnuih mă bruă, čih pôr pơthâo 10 hrơi hăng anai laih, ăt lu plang tơlơi pơhing pơdah thâo samơ̆  ƀiă mơnuih đôč rai mă bruă aka truh 10 čô ôh. Ră anai, kơƀah mơnuih mă bruă lu biă mă. Kơƀah mơnuih mă bruă bơbeč prong biă  amăng bruă mă, bơhmutu anom bruă ta kiăng pok pơhư dơ̆ng hơdôm bruă pơkra ming phrâo laih anun ngă hơđong bruă mă hơđăp samơ̆ kŏn khin pok lơi hŭi ƀu hơmâo mơnuih mă bruă”.

Tui hăng anom bruă bơwih bơwăng ĕp bruă mă tơring čar Dak Lak, truh klâo blan tal sa thun anai, hơmâo 674 boh sang bruă sĭ mơdrô amăng lăm hăng gah rơngiao kơ tơring čar čih anăn ĕp mơnuih mă bruă, kiăng jak iâu 30 rơbâo čô mơnuih mă bruă apah. Mah hnun, 3 blan laih rơgao, anom bruă phrâo lăi pơthâo brơi kơ 10 rơbâo čô mơnuih hăng mrô arăng kiăng iâu mă bruă dŏ lu biă mă. Ơi Nguyễn Văn Cường, Kơ-iăng Khua anom bruă anai brơi thâo, lu mơnuih yua bơbeč mơ̆ng klin Covid 19 dŏ kơtang đôč.

“Lu mơnuih mă bruă truh mông anai hơmâo tŭ jum hơdôm čô mơnuih gơñu iâu mă bruă kơnang kơ tơlơi lăi pơthâo pơ să phường soh đôč, ăt kah hăng amăng anih lăi pơthâo tơlơi pơhing bruă mă. Khă tui anun yua bơbeč djơ̆ klin anun lu mơnuih mă bruă gơñu dŏ hŭi aka ƀu khin pơwơ̆t glăi mă bruă amăng anih tuh tia pơkra ming sa ƀut yua kơ anun yơh kơƀah mơnuih mă bruă lu biă mă”.

Tui hăng tơlơi jŭ yap mơ̆ng Jơnum min mơnuih ƀôn sang tơring čar Dak Lak: Amăng klâo blan tal sa thun 2022, hơmâo 227 boh sang bruă pơwơ̆t glăi mă bruă, đĭ tui 22,7% pơkă hăng thun 2021. Rơngiao kơ anun, hơmâo 327 boh anom bruă akŏ pơjing phrâo, kiah hơmâo 21,8% pơkă hăng akŏ bruă, đĭ tui 19,78% pơkă hăng tal anai mơ̆n thun hlâo. samơ̆ yua tơnap tap đơi amăng bruă ĕp mơnuih mă bruă, biă mă ñu ƀing mă bruă thâo bruă, kơhnâo kơhnăk ƀiă pơkra ming ƀiă đơi, anun yơh ngă kơ lu kông ty, anom bruă tơnap tap.

Tui hăng ơi Nguyễn Hoàng Giang, Khua Gơnong bruă mă tơhan rơka hăng mơnuih mơnam tơring čar Dak Lak, Gơnong bruă ñu hlăk gir run tui ƀơ ƀrư̆ pơsir bruă mă ĕp mơnuih hăng pơtô hrăm bruă mă. Khă tui anun, boh tơhnal tŭ yua blung a aka ƀu djơ̆ tui anŏ ta kiăng ôh.

“Gơnong bruă Bruă mă tơhan rơka hăng mơnuih mơnam  ngă hrom djop sang bruă lăi pơthâo tơlơi pơhing, pơhưč bruă mă, hơmâo hơdră apah prăk djơ̆ lăp kiăng ƀing mă bruă apah pơwơ̆t glăi mă bruă. Bơ hơdôm ƀing kiăng hrăm bruă, pơtô brơi bruă mă amăng tơring čar khom pok anih pơtô bruă na nao ƀơi djop tơring glông, ngă tui bruă pôr pơthâo jak iâu mut hrăm bruă, pơhrăm brơi lu mơta brua wmă, samơ̆ truh ră anai kiah dưi ngă rơbêh 8,6% đôč. Pơ anăp anai, amra gir run hloh kiăng ngă tui bruă pơtô hrăm bruă mă kiăng thâo hruaih kơhnăk amăng bruă mă kơ mơnuih mă bruă apah ƀơi Dak Lak".

Lơ̆m lu sang bruă sĭ mơdrô, anom bruă pơkra ming gơnam sĭ mơdrô dŏ kơƀah mơnuih mă bruă thâo bruă hăng kơƀah anun ngă bơbeč djơ̆ hnong pơkra ming gơnam sĭ mơdrô, rŭ glăi tơlơi bơwih ƀong huă, bruă pok pơhai djru anih anom mă bruă pơsir tơlơi tơnap tap kơ djop sang bruă sĭ mơdrô ră anai glăk kiăng ječ ameč biă mă yơh ră anai.

            Nam Trang-Pô čih: Nay Jek pơblang