Tơring čar Dak Lak ră anai hmâo lŏn prong, mrô mơnuih ƀôn sang gah ƀut hơdôm bôh tơring čar, ƀôn prong ba jơlan hlâo đơ đam dêh čar, hrŏm hăng anun lĕ glông jơlan nao rai yôm phăn mơ̆ng Dap Kơdư; hmâo tơlơi gal gah gum hrŏm, tô nao rai anih anom pơđĭ kyar, pơjing pran pơtrut gum hrŏm pơđĭ kyar bơwih ƀong, bôh thâo đưm, mơnuih mơnam hăng hơdôm plơi pla amăng kual Dap Kơdư, kual kơtuai hăng ia rơsĭ tŏng krah dêh čar hăng hơdôm anih anom phun bơwih ƀong prong mơ̆ng đơ đam dêh čar. Bơwih ƀong pơđĭ kyar hloh rơnoh pơkă, djă pioh rơnoh pơđĭ kyar hơnong ñu hmâo 8% sa thun amăng 20 thun jê̆ hăng anai. Biă ñu, Dak Lak dô̆ jing anih tum pơƀut lu gru phara gah bôh thâo đưm, phiăn juăt mơ̆ng plơi pla 49 djuai ania hơdip hrŏm, amăng anun hmâo “Bôh thâo čing hơgor Dap Kơdư” dưi hmâo Khul UNESCO tŭ yap lĕ bôh thâo đưm hăng kông ngăn đưm mơ̆ng ană mơnuih.

Phrâo anai, nao pơhmư̆ hăng đĭ pơhiăp amăng mông ngă Lơphet hơdor glăi 120 thun Dak Lak pơjing hăng pơđĭ kyar, Kơ-iăng Khua dêh čar ơi Nguyễn Hòa Bình pơtŏng sit: anih dŏng yôm phăn, bruă mă mơ̆ng tơring čar Dak Lak pioh kơ kual hăng lŏn ia dưi pơsit amăng lu hơdră pơtrun, hơdră bruă mơ̆ng dêh čar tui hơdôm tal. Rơđah hloh lĕ klah čun mrô 67 mơ̆ng Ding jum kơđi čar kơ “Pơdŏng hăng pơđĭ kyar plơi prong Buôn Ma Thuột, tơring čar Dak Lak truh thun 2030, tơhnal lăng nao truh thun 2045”; Tơlơi pơtrun pơsit mrô 72 mơ̆ng Khua pơ ala mơnuih ƀôn sang kơ hơdră pơkă, hơdră bruă mă phara pơdŏng, pơđĭ kyar plơi prong Buôn Ma Thuột jing plơi prong phun kual Dap Kơdư; Tơlơi pơtrun pơsit mrô 23 mơ̆ng Ding jum kơđi čar gah jơlan gah pơđĭ kyar bơwih ƀong – mơnuih mơnam hăng pơhlôm pơgang lŏn ia, rơnuk rơnua plơi pla kual Dap Kơdư truh thun 2030, tơhnal lăng nao truh thun 2045... pơtŏng sit bruă mă prong hmâo ba tơbiă hăng tơring čar Dak Lak lĕ pơđĭ kyar bơwih ƀong khom djơ̆ hăng bôh thâo đưm, mơnuih mơnam, plơi pla, pơgang lŏn ia, rơnuk rơnua plơi pla; hrŏm hăng anun, khom jing anih phun, ba jơlan hlâo pơđĭ kyar amăng kual.

Kơ-iăng Khua dêh čar ơi Nguyễn Hòa Bình lăi rơđah, kiăng ngă giong truh kih hơdôm tơhnal ba tơbiă, bruă jao ba tơbiă, Ping gah, gong gai hăng mơnuih ƀôn sang djop djuai ania amăng tơring čar khom gum hrŏm hơbit, gir run, đing nao git gai, črâo ba ngă tui klă hơdôm bruă jao, phun tui anai:

“Iâo pơhrui pran kơtang, mă yua ba glăi bôh tơhnal anô̆ hmâo, anô̆ gal pơđĭ kyar, pơtrut kơtang pơđĭ kyar; pơplih phrâo hơdră bơwih ƀong, phun ñu lĕ pơđĭ kyar hơdôm mơta gơnam mă mơ̆ng đang hmua hmâo anô̆ gal, prong, kơjăp, hmâo sĭ kơ dêh car arăng lu; pơtrut bruă đang hmua pơkra gơnam mă mơ̆ng đang hmua, akan hơdang hăng pơkra glăi apui yua; pơdŏng glông bruă kơđi čar klă, kơjăp, yua kơ mơnuih ƀôn sang bơwih bruă; pơđĭ kyar bơwih ƀong – mơnuih mơnam, pơgang anih anom dô̆, pơhlôm hơđong mơnuih mơnam; pơhlôm pơgang lŏn ia, rơnuk rơnua plơi pla hăng hơđong pơhlôm mơnuih mơnam”.

Ơi Nguyễn Đình Trung, Ding kơna Ping gah dêh čar, Khua git gai Ping gah tơring čar Dak Lak brơi thâo, amăng črăn jơlan pơ̆ anăp, hrŏm hăng hơdôm tơhnal gal, gêh gal lĕ phun ñu, Dak Lak ăt dŏng ƀơi anăp ƀu ƀiă tơnap, tơlơi lông, khom abih bang glông bruă kơđi čar amăng tơring čar rŭ tơgŭ dong, ngă tui kơtang pran jua khăp kơ lŏn ia, pran kơtang gum hrŏm hơbit abih bang djuai ania, mă anô̆ hmâo, anô̆ gal; hơneč mă tơlơi lăng ba mơ̆ng Ping gah, Kơnuk kơna, tơlơi dŏng yua mơ̆ng anom bơwih ƀong hăng hơdôm gưl mơnuih ƀôn sang; lăi pơthâo dơlăm, pơhlôm abih bang, tum djop hăng ngă tui tơpă tơlơi pơmin “Pơđĭ kyar bơwih ƀong lĕ bruă jao phun, pơdŏng Ping gah lĕ bruă jao phun, pơdŏng glông bruă kơđi čar klă kơjăp, rơguăt, mă bruă tŭ yua, ba glăi bôh tơhnal; djă pioh hăng pơđĭ kyar bôh thâo đưm djă jă gru grua djuai ania lĕ phun than pran jua mơ̆ng mơnuih mơnam, pơjing pran pơtrut pơđĭ kyar kơjăp; pơhlôm pơgang lŏn ia, rơnuk rơnua lĕ bruă jao phun, na nao”.

“Ping gah, gong gai, tơhan hăng mơnuih ƀôn sang djop djuai ania tơring čar Dak Lak ƀuăn amra bư̆ bôr đĭ dong phiăn juăt ngă hơkrŭ hur har hăng pran khăp kơ lŏn ia; pơpŭ hăng djă pioh hơdôm bôh than mơ̆ hơdôm rơnuk ơi yă nao hlâo hmâo pơjing; gum hrŏm hơbit, gum hrŏm sa jua, gir run yak rơgao tơlơi tơnap, tơlơi lông, pran pơsit pơdŏng tơring čar Dak Lak pơđĭ kyar tañ, kơjăp kơtang, jai hrơi jai pơdrŏng asah klă hiam, thâo rơgơi, djă jă gru grua; djru pơjing phun than kơjăp hrŏm hăng đơ đam dêh čar yak mut rơnuk phrâo – rơnuk phrâo hrưn đĭ pô mơ̆ng djuai ania Việt Nam”.

Ngă tui anô̆ hmâo, anô̆ gal mơ̆ng kual lŏn hmâo lu phiăn juăt gru grua, tum pơƀut anô̆ yôm bôh thâo phiăn juăt mơ̆ng djop djuai ania mơ̆ng djop kual amăng lŏn ia; anih hmâo bruă mă yôm phăn hăng jing anih phun, pran pơtrut pơđĭ kyar kual Dap Kơdư; hăng hơdôm tơlơi glai klô ayuh hyiăng gêh gal, tơring čar Dak Lak glăk gir run hrưn đĭ pơsit pran pơdŏng tơring čar jai hrơi jai kơtang pơdrŏng, djă jă gru grua, thâo rơgơi, yâo mơ-ak./.