Kiăng pơhlôm klă anŏ hơdjă mơnong ƀong huă amăng bơyan ngui ngor pioh kơ čơđai muai ƀrô Blan bơrơmi ria tơ-ua bơbung sang, ta juăt lăi blan bơrơmi ria têt trung thu thun anai, Jơnum min mơnuih ƀôn sang tơringčar Dak Lak hơmâo ngă hră pơtrun akŏ pơjing 2 grup hyu mă bruă mơ̆ng lu sang bruă pơhlôm hơdjă mơnong ƀong huă ƀrô djơ̆ hrơi čơkă Blan bơrơmi ria thun 2024 ƀơi plơi prong Ƀuôn Ma Thuôt, plơi prong Ƀuôn Hô, hơdôm tơring glông Krông Pač, Ea Kar, Čư̆ Kuin hăng Lak.

Hrơi blan hyu ĕp lăng mơ̆ng lơ 11-13/9. Lơ̆m hyu mă bruă, 2 grup anao ĕp lăng bruă ngă tui djơ̆ tơlơi pơtrun mơ̆ng Tơlơi phiăn pơgang hơdjă mơnong ƀong huă ƀơi djop sang bruă, anih anom pơkra ming, sĭ mơdrô ƀañ, mơnong ƀong huă kơ hrơi ngui ngor Blan Bơrơmi ria ƀơi đơ đam tơring čar, mă meh ƀañ, gơnam ƀong pơkra ming anun ba pơčrang kman ƀudah pơčrang anŏ hơdjă hŭi ƀu rơgoh ia jrao răk sui gơnam ƀong huă dŏ đôm glăi amăng mơnong ƀong. Lơ̆m ĕp lăng tui anun grup amra pơtô lăi, pơčrâo ba tơlơi phiăn kơnuk kơna pơkă kơ bruă mă pơkra ming pơjing mơnong ƀong huă khom hơdjă rơgoh pioh sĭ mơdrô, tơlơi thâo hơdră pơhlôm hơdjă mơnong ƀong huă kơ djop sang bruă, pô anih anom pơkra ming pơjing rai gơnam sĭ mơdrô thâo ngă djơ̆ hnơ̆ng pơkă rơgoh hơdjă mơnong ƀong huă.