VOV4.Jarai - Dŏ giăm ha mơkrah blan yơh truh hrơi čơkă thun phrâo Nhâm Dần 2022, anai lĕ hrơi mông mơnuih ƀon sang tơring čar Dak Lak luh nao blơi gơnam tam pioh yua amăng bơyan čơkă thun phrâo. Bruă tum pơƀut lu mơnuih amăng hrơi blan klin Covid-19 ƀơi ƀon lan ăt dŏ tơnap tap lơ̆m rĭm hrơi tơring čar hơmâo giăm 200 čô mơnuih ƀă klin amra dŏ lu tơlơi hŭi rơhyưt hăng klin amuñ lar hyu amăng mơnuih mơnam. Kiăng kơ huăi bưp tơlơi truh sat, gong gai ƀon lan hăng hơdôm anom bruă hơmâo pơtrut kơtang hơdôm hơdră pơgang klin Covid-19.

Ƀơi hơdôm sang čơ amăng plơi prong Buôn Ma Thuột, bruă pơgang klin ăt hơmâo pơphun ngă tui khut khăt. Pơhmutu lĕ ƀơi kông ti pơčruih ngăn bơwih ƀonh sĭ mơdrô sang čơ Buôn Ma Thuột, mrô mơnuih mut nao blơi gơnam amăng sang čơ lu ƀiă pơhmu hăng hơdôm hrơi blan pơkŏn, samơ̆ bruă pơgang klin ăt hơmâo đing nao mơn. Ră anai ƀơi sang čơ Buôn Ma Thuột hơmâo giăm 8.000 čô mơnuih sĭ mơdrô. Abih bang mơnuih sĭ gơnam amăng sang čơ lêng kơ tlâ̆o 2 ară vaccine pơgang klin Covid-19. Ƀơi hơdôm bah amăng mut nao rai sang čơ, Grup wai lăng sang čơ lêng kơ dưm ia jao rao tơngan hăng anih pơhaih gah ia jrao hăng bruă mă mrô QR kơ ƀing mơnuih yua măi telephôn rơgơi hăng čih glăi anăn amăng hră pơ-ar hăng ƀing mơnuih ƀu yua măi telephôn rơgơi. Kơ bruă pơtô pơblang, sang čơ Buôn Ma Thuột hơmâo tĕp, tol pano, áp phích kơ črâo ba amăng bruă pơgang klin ƀơi hơdôm anih mơnuih găn nao rai lu; pơphun hyu pôr hơdôm tơlơi pơhing phrâo hloh, hơdôm tơlơi pơplih amăng tơlơi pơkă amăng pơgang klin … Ơi Nguyễn Duy Quảng, Khua grup wai lăng sang čơ Buôn Ma Thuột brơi thâo:

“Prap lui hrơi čơkă thun phrâo tui phiăn juăt pơ anăp anai, mơnuih ƀon sang nao blơi gơnam amra lu biă mă, laih dong gơnam tam ba rai ăt lu mơn. Amăng bơyan čơkă thun phrâo anai ƀing gơmơi juăt pôr amăng loa kiăng kơ mơnuih rai lơ̆m gơnam kah hăng ƀing sĭ mơdrô ngă tui amăng bruă truă akhăn gô̆m ƀô̆, dŏ ataih tơdruă hăng pơhlôm klă hloh amăng bruă pơgang klin”.

Mơnuih mă bruă amăng sang sĭ mơdrô pơčrang hyuh drơi jăn ƀing mơnuih nao blơi gơnam

Bơ ƀơi hơdôm sang sĭ mơdrô pơprong amăng plơi prong, mơng bah amăng mut nao rai, ƀing mơnuih mă bruă ƀơi hơdôm sang sĭ mơdrô anai lêng kơ rơkâo mơnuih ƀon sang rao tơngan, pơhaih gah ia jrao hăng pơtă pơtăn mơnuih ƀon sang dŏ ataih tơdruă lơ̆m mut nao blơi gơnam. Laih dong, hơdôm sang sĭ mơdrô ăt rơkâo abih bang mơnuih ƀon sang, ƀing mơnuih mă bruă khŏm truă akhăn gôm ƀô̆ hăng rao tơngan hăng ia jrao tơdơi kơ tek rơwek gơnam ƀing gơñu blơi.

Tui hăng ơi Bùi Văn Quân - Khua Sang sĭ mơdrô prong Siêu thị Go Buôn Ma Thuột hrŏm hăng bruă prap lui mă pơčrang lăng hyuh amăng drơi jăn, ia jrao rao tơngan hăng anih pơhaih gah ia jrao brơi kơ mơnuih ƀon sang pơdong ƀơi bah amăng jang mut nao, sang sĭ mơdrô gơnam ăt pơčrang brơi tañ hŭi ƀă klin Covid-19 rĭm wŏt hrơi tơjuh brơi kơ ƀing mơnuih mă bruă. Hrŏm hăng anun, rĭm hrơi tơdơi kơ krư̆ amăng, sang sĭ mơdrô amra pruih ia jrao djop anih amăng sang sĭ mơdrô hăng jrao Cloramin B kiăng pơgang klin Covid-19….

“Abih bang mơnuih mă bruă lêng kơ truă akhăn gôm ƀô̆ soh, ƀing mơnuih juăt jê̆ giăm hăng mơnuih mut nao blơi gơnam khŏm truă gơnam pơgang hŭi kơ djơ̆ ia mơbah, kơnong ƀing pơhrui prăk, sang sĭ mơdrô rơkâo khŏm čut akhăn ƀơi tơngan yua ƀing anai pơhrui prăk kak rĭm hrơi amuñ ngă klin lar hyu. Hăng abih mơnuih mut nao blơi gơnam khŏm pơhaih gah ia jrao. Laih dong ƀing gơmơi ăt prăk lui măi pơčrang lăng hyuh amăng drơi jăn kah hăng hơmâo măi pruih ia jrao brơi kơ mơnuih mut nao rai”.

Hơdôm pano, áp phích dưm ƀơi bah amăng mut nao sang čơ Buôn Ma Thuột

Lăng glăi bruă hơdom sang čơ, sang sĭ mơdrô pơprong ngă tui hơdôm hơdră pơgang klin Covid-19 ƀơi anih anom, yă Phạm Thị Tuyết Nhung, ngă bruă gah anom bruă črâo ba gah bruă ia jrao, Gơnong bruă ia jrao tơring čar Dak Lak, ding kơna amăng grup pel ĕp brơi thâo:

“Sit biă ñu djop anih anom lơ̆m pok pơhai ngă tui, sa, dua anom bruă aka ƀu thâo rơđah hơdôm pok hră pơtrun phrâo, yua anun hơdôm anom  bruă anai dŏ pơtah tai lơ̆m pok pơhai ngă tui, lu sang čơ mơnuih mă bruă lu hăng ƀing gơñu aka ƀu ngă tui djơ̆ tơlơi pơkă 5k hăng lu anih anom lơ̆m pok pơhai ngă tui aka ƀu djơ̆ hăng črâo trun. Mơng hơdôm tal pel ĕp anai ƀing gơmơi hơmâo črâo brơi tong ten hăng pel ĕp glăi hơdôm anŏ aka ƀu klă kiăng kơ pơsir hĭ mơtăm, tơdơi kơ 10 hrơi, grup amra tŏ tui pel ĕp dong hăng lăng glăi hơdôm hơdôm bruă bruă mơ̆ grup hơmâo epl ĕp hlâo anun”.

Mơnuih ƀon sang glăk pơčrang mrô QR pơhaih gah ia jrao hlâo kơ mut nao blơi gơnam

Amăng hrơi blan klin Covid1-19 dŏ ngă tơnap tap, hơdôm anih sĭ gơnam tam kar hăng sang čơ, siêu thị lĕ sa amăng hơdôm anih amuñ ngă klin lar hyu. Yua anun, hrŏm hăng bruă hơdôm anih anom gơgrong ngă tui khut khăt hơdôm tơlơi pơkă amăng pơgang klin, ăt kiăng hơdôm tơlơi gum hrŏm mơng abih bang mơnuih kiăng kơ pơgang hŭi klin lar hyu amăng hơdôm hrơi prap čơkă thun phrâo.

Siu Đoan: Pơblang