Tong krah blan 4 pơ-iă kơtang, ƀơi kual Yok Đôn lĕ kual pơ-iă hloh, 8 čô mơnuih gah anom bruă wai lăng glai mrô 1, anom bruă wai lăng glai dêh čar York Đôn (Dak Lak) ăt gir run hyu rơmet pơagaih, ngă tui bruă pơƀut čuh hĭ asuk ruk. Ơi Nguyễn Hữu Tạo - Kơ-iăng anom bruă wai lăng glai dêh čar York Đôn brơi thâo, ră anai lĕ glăk bơyan không phang, amuñ ƀuh apui ƀong glai đĭ gưl V lĕ hŭi rơhyưt hloh. Kiăng pơgang hŭi apui ƀong glai anom bruă hơmâo gum hrŏm hăng hơdôm anom bruă pơkŏn pơpha bruă brơi giăm 200 čô mơnuih apăn bruă kiăng hyu tir wai lăng hăng pơgăn apui ƀong glai.

“Djop anom bruă khŏm wai lăng tơhrơi kah hăng mlăm ƀơi hơdôm anih amuñ apui ƀong, ngă tui jơlan hơdră čuh hĭ rơk tok, hla kyâo krô kiăng guang dar pơgang apui ƀong. Anai lĕ lơ̆m ƀuh ƀơi anai amuñ apui ƀong ƀing gơmơi rơmet pơagaih jum dar, hrơi tơdơi amra hyu rơmet hĭ pơkŏn dong, yua anun amra pơhlôm tơdah ƀuh apui ƀong glai ăt huăi ngă lar hyu kual glai rưng jum dar. Dua dong lĕ, pơging brơi lŏn rơ-ơ̆ kiăng rơk tok, kyâo pơtâo bluh đĭ kiăng pơhlôm gơnam ƀong brơi hlô mơnong”.

Hrŏm hăng bruă pơgang apui ƀong glai glăk pok pơhai đơ đam tơring čar, hơdôm anom bruă gah tơhan wai lăng glai rưng hăng ƀing mơnuih wai lăng glai ăt đing nao bruă hrưn đĭ klă dong amăng bruă pơgang apui ƀong. Ơi Hồ Văn Lành, Kơ-iăng khua anom bruă wai lăng glai Krông Năng-Buôn Hồ brơi thâo, yua kơ hơmâo tơlơi prap lui klă mơng mơnuih mă bruă kah hăng gơnam măi mok laih dong hơdră pơgang apui ƀong ƀơi anih, bruă apui ƀong ƀơi Tiểu khu 299 gah să Čư̆ Klông, tơring glông Krông Năng, ƀuh amăng akŏ blan 4 anai hơmâo prah hĭ hmao tlôn.

“Tơdơi kơ hmư̆ hing ƀuh apui ƀong glai, ƀing gơmơi hơmâo gum hrŏm hăng grup wai lăng glai ječ ameč nao nao prah apui ƀong glai mrô 3 (gah anom bruă wai lăng glai rưng tơring čar Dak Lak), ƀing wai lăng glai hăng gong gai ƀon lan, pơphun pơƀut glăi rơbêh 40 čô mơnuih nao prah apui. Abih bang ngă tui tơlơi pơkă 4 mơta ha anih kiăng pơgang apui ƀong, hăng tơlơi gir run mơng adơi ayong, apui hơmâo prah hĭ hmao tlôn, ƀu hơmâo tơlơi sat răm hơget ôh”.

Tui hăng ơi Nguyễn Quốc Hưng- Khua anom bruă wai lăng glai tơring čar Dak Lak, ră anai, giăm ha mơkrah glai rưng amăng tơring čar, dưm dưm giăm 237.000 ektar glăk hŭi rơhyưt amuñ apui ƀong glai. Amăng anun 189.000 ektar amuñ ƀuh apui ƀong hloh hăng rơbêh 48.000 ektar lĕ glăk hŭi rơhyưt hloh. Yua anun, tơhan wai lăng glai, ƀing wai lăng glai rưng ƀudah Jơnum min mơnuih ƀon sang hơdôm boh să glăk đing nao bruă pơgang glai rưng. Ơi Nguyễn Quốc Hưng pơsit tong:

“Tơlơi kơ bơyan ƀong tết tui phiăn juăt truh ră anai, ƀing gơmơi glăk gơgrong pơjing hơdôm akŏ bruă tơdơi anun pok pơhai ha amăng plĕ tơl hơdôm anom bruă wai lăng glai tơring glông, 3 grup wai lăng glai kiăng gum hrŏm hăng hơdôm boh ƀon lan ngă tui bruă pơgang apui ƀong. Sit biă ñu, amăng bơyan không phang amăng akŏ blan 4 anai, anom bruă wai lăng glai tơring čar ăt hơmâo akŏ pơjing Grup wai pel ĕp pơlir hơbit djop gơnong bruă hyu pel ĕp, pơtrut pơsur ƀing wai lăng glai ƀơi hơdôm boh tơring glông anun lĕ: Ea Súp, Ea Kar, M’drak, Čư̆ Mgar, Buôn Đôn, Krông Bông, Lak…kiăng pơhlôm bruă pơgang glai rưng. Ƀing gơmơi ăt pel ĕp bruă prap lui rơdêh, măi mok, mơnuih mă bruă kiăng pơhlôm klă hloh tơdah ƀuh apui ƀong, kiăng hơmâo hơdră prah apui hmao tlôn”.