Hăng pran jua mă bruă glăm ba prong, ƀing khua mua pơ ala mơnuih ƀôn sang dêh čar Gia Lai hơmâo kơsem min, ĕp lăng tong ten laih anun pơčrong sai hăng pơsit hĭ 21 pok hră pơtrun yom, amăng anun hơmâo 2 pok hră pơtrun pơdjơ̆ nao kơ bruă ruah khua mua, 7 pok hră pơtrun pơdjơ̆ nao kơ bruă pơblih hơdră yua lŏn kiăng hơdôm ring bruă  pơprong yom amăng tơring čar dưi mă yua djơ̆ lăp, hăng abih bang đơ đam lŏn glai pơblih yua rơbêh 161 hektar mơ̆ng lŏn glai; hơdôm pok hră pơtrun anai dưi ngă tui mơ̆ng lơ 9/2/2026 mơtam.

Pơhiăp klah čun pơđut jơnum, Kơ-iăng khua git gai ping gah, Khua khul pơ ala mơnuih ƀôn sang tơring čar Gia Lai, Rahlan Chung lăi pơtong, tơdơi kơ jơnum anai, hrŏm hăng bruă pok pơhai ngă tui Hră pơtrun mơ̆ng Ping gah dêh čar tal XIV hăng Hră pơtrun ping gah tơring čar tal I, Jơnum min mơnuih ƀôn sang, djop gơnong bruă ƀơi tơring čar hăng djop să, phường pơtum nao ngă tui tŭ yua djop bruă jaom phun, kiăng kơ  abih bang hră pơtrun anun tañ dưi ngă tui amăng tơlơi hơdip mơda rim hrơi.