Pơhiăp đĭ amăng mông jơnum bơkơtuai nai tha prin, nai prin tha ơi Nguyễn Xuân Thắng, Khua khul mơnuih rơgơi nai pơtô djơ̆ dêh čar brơi thâo: Tal jơnum bơkơtuai anai jing bruă mă prong blung a, kiăng ba Hră pơtrun mơ̆ng ping gah dêh čar tal 14 ngă tui sit nik amăng tơlơi hơdip mơda, jơnum prong bơkơtuai tong ten djơh hăng anai. Mơ̆ng anun, kiăng pơtô lăi, pơtong rơđah boh yom phun tơlơi git gai mơ̆ng Khua git gai ping gah ơi Tô Lâm, khom pok pơhai ngă tui mơtam tơdơi kơ jơnum giong, hăng pran jua ngă tui khut khăt, sit nik, hmar tañ hăng tŭ yua, djru hrŏm amăng bruă mă, ngă tui truh kih djop tơhnal pơkă, bruă mă mơ̆ng Jơnum ruah khua ping gah dêh čar tal XIV.

 “Anai lĕ jơnum blung a hăng ƀing ta kiăng pơphun ngă tui lu wơ̆t jơnum, pơčrong sai, hơduah ĕp anŏ thâo rơgơi lăi pơthâo tong ten hloh, dơlăm kơ rim mơta bruă. Amăng anun, wơ̆t hăng bruă pơtrut pơđĭ kyar hmar, hơđong kơjăp amăng rơnuk gêh găl phrâo; tơlơi pơkă hnơ̆ng rơnoh pơđĭ kyar truh dua mrô, lir hơbit hăng bruă akŏ pơjing rơnoh pơđĭ kyar phrâo, khom hơmâo mông jơnum bơkơtuai hlâo tui anun. Ƀing ta ăt kiăng hơmâo mông jơnum kơ bruă pơđĭ kyar ia rơgơi tơlơi kơhnâo phrâo tơlơi pơhing, pơblih anŏ pơčeh phrâo ia rơgơi samơ̆ anŏ lăng nao lĕ pơphun ngă tui Hră pơtrun anun, boh nik ñu Hră pơtrun 57, hră pơtrun 59, hră pơtrun 66, hră pơtrun 68….Klah čun mă lĕ hơmâo 9 hră pơtrun kơ bruă mă yom hloh, kiăng pơpha rơđah ngă tui hră pơčrâo ba amăng Hră pơtrun tal 14. Tơlơi čih pơtrun amăng hră jơnum ping gah lĕ ƀing ta ăt khom kơjăp kiăo tui kru gah yŭ hla kơ ping gah, gum pran hrŏm, kiăng ngă tui tơhnal pơkă 100 thun, hăng pran jua ngă pô, hrưn đĭ, đăo tong ten yak nao rơnuk amăng rơnuk phrâo. Tơhnal pơkă pơđĭ tui tơlơi hơdip mơda, tơlơi mơak hlak kơ mơnuih ƀôn sang”.

Ƀơi mông jơnum anai hơmâo pơphun dua wơ̆t jơnum anet amăng khul grup pơčrong “Ba hră pơtrun tui tơlơi pơkă phrâo amăng hơdrôm hră Jơnum ping gah dêh čar tal XIV ngă tui sit nik amăng tơlơi hơdip mơda” hăng “Ba jơlan hơdră pơphun ngă tui hră pơtrun jơnum ping gah dêh čar tal XIV ngă tui amăng tơlơi hơdip mơda”.

Kơ-iăng nai tha prin, nai prin tha ơi Dương Trung Ý, Khua sang bruă Hră pơhing phrâo Cộng sản lăi pơtong: Jơnum ruah khua ping gah dêh čar tal XIV, pơblih phrâo kơtang biă mă, hmar amăng tơlơi pơmin, anŏ lăng nao pơ anăp hăng tơlơi či kiăng pơđĭ kyar, jing jơnum ruah khua mơ̆ng ia rơgơi tơlơi pơmin prong hăng pran jua khut khăt ngă tui bruă yom pioh ba lŏn ia kơjăp yak nao amăng rơnuk phrâo hrưn đĭ pô mơ̆ng djuai ania. Hră pơtrun mơ̆ng ping gah tal anai, pơkă kơ lu tơlơi kiăng phrâo pơtrut khom ngă bruă, pơhiăp khom nao hrŏm hăng bruă mă, pơtong rơđah tơhnal pơtrun, bruă či ngă tui, hơdră pơsir glăm ba hăng boh tơhnal dưi ngă, khom pơblih kơtang, lir hơbit hăng pran jua mă bruă tơpă, djơ̆ pran jua ană plơi pla. Kơ-iăng nai tha prin, nai prin tah ơi Dương Trung Ý lăi:

“Bruă ngă hơmâo rơđah sit nik, rơnoh yom mơ̆ng djop hră pơtrun anai ƀu kơnong lăi pơthâo boh yom phun, tơlơi pơmin kiăng dưi čih pioh lăi pơthâo đôč ôh, jing djop bruă mă hơmâo pơtong glăi tong ten bruă ngă sit nik hơmâo čih amăng hră pơtrun. Hră pơtrun mơ̆ng Ping gah hơmâo rơnoh yom hăng ngă tui sit nik amăng tơlơi hơdip mơda, hơmâp pơƀuh rơđah, kiăng ngă pơblih kơtang tŭ yua sit nik kơ tơlơi hơdip mơda, djop jơlan hơdră, bruă kơđi čar, bơwih ƀong huă mơnuih mơnam, pơgang lŏn ia, hơđong dêh čar, bruă pơtom hiăp mơ̆ng dêh čar hăng gơyut gơyâo tač rơngiao laih anun lăi pơthâo khăng khŏp tơlơi đăo kơnang mơ̆ng abih bang mơnuih ƀôn sang hăng ping gah, kơnuk kơna ta. Kiăng dưi ngă djơ̆ tơlơi pơmin, anŏ kiăng, tơhnal pơkă, bruă ngă glăm ba mơ̆ng Hră pơtrun tal 14, tơlơi thâo hluh, khom pơtô brơi tong ten boh yom phun tơlơi pơmin phrâo amăng Hră pơtrun tal 14 mơ̆ng Ping gah jing yom pơphăn biă mă hăng či kiăng ječ ameč mơ̆n”.

Klah čun glăi mông jơnum, Kơ-iăng nai tha prin, nai prin tha Đoàn Minh Huấn, Khua sang hră kơđi čar dêh čar djă anăn Hồ Chí Minh lăi: Jơnum anai pơphun hmao kru, djơ̆ hrơi blan,  hmar, kiăng lăi pơthâo djơ̆ lăp djop mơta tơlơi pơtrun mơ̆ng Gơnong dlông kiăng hmao ngă tui, ƀu tơguan găn rơgao lu čăl, lu yak ôh, hlong pơphun ngă tui mơtam laih jơnum ping gah tal 14. Pran jua anŏ kiăng ngă tui tal jơnum pơčrong sai anai, ƀuh rơđah anŏ pơblih phrâo pơčrong sai hăng boh tŭ yua mơ̆ng tơlơi pơgôp hiăp. Ƀing khua mua jơnum pơtum nao kơ anŏ pơblih kơtang, hơdră pơtrut rơnoh pơđĭ kyar bơwih ƀong huă, djop sang bruă mơdrô yua mơnuih ƀôn sang ngă pô truh pơ bruă mă pơgang rơnuk rơnua dêh čar hăng pơtom hiăp. Lăi pơtong, bruă mă phun, kiăng pok pơhai, ơi Đoàn Minh Huấn rơkâo djop sang bruă kiăng hơdai gum hrŏm, pôr pơthâo kơ boh tơhnal jơnum bơkơtuai anai, tui hluai bruă mă, tơlơi dưi pô. Mơ̆ng anun, ngă tui tum teč boh tơhnal hơmâo hrăm, kơsem min amăng Hră pơtrun tal XIV mơ̆ng ping gah, brơi dưm nao amăng akŏ bruă, dăp hlâo či ngă, jơlan hơdră pơphun mă bruă mơ̆ng rim sang bruă, anom bruă kơnuk kơna hăng mơnuih ƀôn sang.

 “Hlâo kơ tal jơnum ngă hrŏm ba Hră pơtrun kơsem min. Giong jơnum ba Hră pơtrun anun ngă tui mơtam amăng tơlơi hơdip mơda. Anai yơh plah wah tơlơi ngă hăng bruă pơtô djơ̆ hăng ngă tui sit nik, ƀing ta hơmâo ĕp ƀuh laih: Hơdôm boh yom phun hơmâo lăi pơthâo lu tơlơi, bruă mă  ƀơi anăp, ƀiă hrơi, sui thun kiăng ngă amăng thun 2026 mơtam, hơmâo hơdôm tơlơi amra ngă tui pơ anăp plah wah guang bruă, kah hăng anŏ pơblih kơtang, phrâo hloh kiăng sem lăng tong ten djơ̆ găl. Hơdôm bruă mă pơtrut hmar, lăng nao pơ anăp adih jing hơbô̆ bruă, jing bruă ngă khom ngă, jing bruă kơ abih bang hăng rim tơring čar, plơi pla ngă tui.