Mă bruă hăng pơpŭ thun phrâo anom bruă ping gah, gong gai hăng mơnuih ƀôn sang Tây Ninh, ơi Tô Lâm, Khua git gai ping gah dêh čar ta hơmâo nao bưp hăng pơpŭ thun phrâo kơ ƀing tha rơma khua mua hơđăp ngă hơkrŭ đưm, ƀing neh wa amĭ Viet Nam khin hơtai, hrŏm hăng ƀing khua mua amăng kơnuk kơna, ling tơhan blah ngă hăng mơnuih ƀôn sang tơring čar Tây Ninh, wơ̆t ƀing mơnuih mă bruă hur har pơ anăn mơnuih khin hơtai amăng bruă mă, tơña bla, hơdor tơngia laih anunm pơpŭ thun phrâo hiam drơi jăn, mơak mơai, mă bruă tŭ yua. Khua git gai ping gah lăi pơtong, mơ̆ng ră anai truh thun 2030 hăng lăng nao pơ anăp adih truh thun 2045 jing sa čăl yom biă mă hăng bruă pơđĭ kyar lŏn ia.

Amăng bruă ngă anun, Tây Ninh kiăng hơmâo tơlơi gơgrong yom, ƀu kơnong pơđĭ kyar hơjăn amăng tơring čar đôč ôh, dŏ ngă hrŏm amăng dêh čar. Tây Ninh hơmâo anih dŏ yom pơphăn amăng kual giăm guai dêh čar, jing anih dưi pơtruh nao rai sa dơnuai hăng kual Dơnung ngŏ laih anun kual dơnung yŭ; jing anih pơgang hơđong, rơnuk rơnua, ngă giăng mah, laih anun anih pơđĭ kyar bruă tuh tia pơkra ming, sĭ mơdrô, bơwih bơwăng, logistics hăng bơwih ƀong huă ƀơi amăng jang jơlan guai dêh čar. Khua git gai ping gah pơtrun hiăp, tơring čar khom pơphun klă bruă plĕ hră ruah khua pơ ala mơnuih ƀôn sang dêh čar tal XVI hăng ƀing pơ ala mơnuih ƀôn sang ƀơi tơring čar hăng pơyŭ rơwang bruă thun 2026-2031; ruah mă ƀing mơnuih ba gru sit nik, nao hlâo pơ ala brơi tơlơi pơmin, anŏ kiăng mơ̆ng mơnuih ƀôn sang, djru hrŏm ngă tŭ yua hloh bruă mă djop sang bruă pơ ala mơnuih ƀôn sang; pơtum nao kơ bruă pơgang rơnuk rơnua, hơđong dêh čar, mơak hlak kơ mơnuih mơnam, boh nik ñu ƀơi jơlan guai dêh čar; akŏ pơjing jơlan guai dêh čar mơak klă, rơnuk rơnua, giăng mah, ngă hrŏm hăng pơđĭ kyar.