Khua git gai Ping gah tơña bla kơ neh met wa Việt Nam dŏ pơ čar rơngiao, bơni biă tơlơi kiăng khăp hăng Lŏn ia, gơgrong bruă hăng plơi pla, lŏn ia. Khua git gai Ping gah lăi rơđah, Ping gah hăng Kơnuk kơna leng kơ lăi pơthâo kjăp rơđah rơđông tơlơi pơmin mơnuih ƀôn sang yơh phun, jing tơlơi ta gơñăm nao, pơtrut pran jua hăng jing tơlơi akŏ phun či đĭ kyar; amăng anun, mơnuih ƀôn sang Việt Nam dŏ pơ čar rơngiao jing ha bơnah ƀu dưi pơčlah ôh mơ̆ng djuai ania Việt Nam, jing mơnuih yom biă mă amăng khul gum pơgôp djuai ania amăng rơnuk hrưn đĭ phrâo.

Khua git gai Ping gah čang rơmang, neh met wa pơ čar rơngiao hơdip kiăo tui tơlơi phiăn, gum pơgôp akŏ pơjing khul mơnuih ƀôn sang jai hrơi prong kjăp, hmư̆ hing, hơmâo kơdrưh, leng kơ gir djă pioh, pơƀuh hyu gru hiam mơ̆ng Việt Nam, pơjing rup hiam kơ lŏn ia, ană mơnuih Việt Nam amăng mơta lăng mơ̆ng gơyut gơyâo jar kmar./.