Akŏ bruă jơlan rơdêh đuăi hmar Hoài Nhơn-Qui Nhơn dong amăng ară jơlan rơdêh đuăi hmar Kơdư-Dơnung gah Ngŏ hơmâo pơkra giong abih laih. Khul wai lăng akŏ bruă mrô 85 brơi thâo, glăk pơgiong djop hră pơ-ar rơnuč kiăng pok brơi rơdêh đuăi amăng jơlan anai bơyan Tết tui phiăn juăt. Ayong Nguyễn Trọng Quân-kông ñơn kông ti pơčruh ngăn mrô 479 Hoà Bình hok mơ-ak hrŏm hăng ƀing kĩ sư-kông ñơn kông ti pơgiong bruă jao, pơgôp pơkra ară jơlan anai pơgiong tañ ƀiă.

“Lăi biă ñu bruă mă mơng ƀing gơmơi ăt glêh glar biă mă, hơmâo tơlơi đing nao mơng ƀing apăn bruă, ƀing gơmơi ăt gir run lu biă mă ngă tơhrơi kah hăng mlăm kiăng kơ tañ bruă čuk pơkra, yua anun ƀing adơi ayong pơplih mông mă bruă hăng gir run pơgiong klă bruă jao”.

Nao lăng tơl anih čuk pơkra jơlan rơdêh đuăi hmar Chợ Mới-Bắc Kạn, Đại tá Võ Khắc Hùng, kơ-iăng Khua anom bruă git gai tơhan mrô 12, Kông ti man pơdong Trường Sơn brơi thâo: Akŏ bruă anai găn nao hơdôm anih triang pơtâo, jơlan čun čoe, tơnap man pơkra, hăng glông 28,8 km, abih tih prăk tuh pơ alin rơbêh 5.750 klai prăk. Ƀing ling tơhan rơnuk wa Hô glăk gir run pơtrut tañ bruă čuk pơkra.

“Ling tơhan Trường Sơn gơmơi pơ-ư ang biă mă, hơmâo Ping gah, kơnuk kơna jao lu akŏ bruă phun, hơmâo jơlan rơdêh đuăi hmar. Ƀing gơmơi pơsit anai lĕ akŏ bruă phun, gir run man pơkra “3 ca 4 kíp djơ̆ hăng pran jua ling tơhan kiăng tañ man pơkra giong”.

Anăn hơdôm anom bruă Việt Nam pơgôp amăng hơnong pơkă pơgiong rơbêh 3.000 km jơlan rơdêh đuăi hmar rơwang anai hơmâo Khua Ding jum man pơdong Trần Hồng Minh lu wŏt lăi pơtong nao pơtong rai, hăng pran đăo gơnang hăng pơ-ư ang anun lĕ Phương Thành, Đèo Cả, Sơn Hải, Lizen, Vinaconex, Trường Sơn…hơdôm anom bruă anai hơmâo ngă tui djơ̆ tơlơi ƀuăn, mă yua boh thâo măi mok, ngă bruă tơhrơi mlăm, đa “khŏm trun kmlai, huač ƀiă” yua kơ bruă čuk pơkra. Pơhmutu, ơi Phạm Văn Khôi, Khua git gai Kông ti Phương Thành brơi thâo, kông ti gơñu ngă 4 akŏ bruă jơlan rơdêh đuăi hmar. Amăng anun, hơmâo 2 akŏ bruă rơwang tal 2 hơmâo Vũng Áng-Bùng hăng Vân Phong -Nha Trang.

Pơwot glăi pơ kual Dơnung, hăng kual lŏn dăo ia krông Cửu Long, ơi Trần Văn Thi, Khua khul wai lăng akŏ bruă Mỹ Thuận- mơnuih pơlir hăng bruă čuk pơkra jơlan glông giăm 30 thun-hmư̆ ñu bơră ruai glăi hơdôm hrơi blan hơdôm rơbâo čô kông ñơn, kĩ sư man pơkra jơlan gir run pơgiong hơdôm ring bruă phun dêh čar, hăng pran gir run, tơlơi thâo thăi mơng ƀing mơnuih “pok jơlan glông” amăng hơdôm ară jơlan rơdêh đuăi hmar mơng Cần Thơ truh pơ Cà Mau.

“Hăng ƀing kĩ sư, kông ñơn Việt Nam, ƀing gơmơi gir run pơplông kiăng pơgiong djop ring bruă tañ mă yua kiăng djru brơi mơnuih ƀôn sang, djru brơi lŏn ia kah hăng kiăng pơtrut pơđĭ kyar bơwih ƀong huă. Hrŏm hăng man pơkra jơlan glông brơi lŏn ia, bruă mă, boh thâo măi mok mơng ƀing mơnuih mă bruă mơng wai lăng truh pơ bruă man pơkra hơmâo pơplih phrâo. Ƀing gơmơi hok mơ-ak lơm ƀuh rơwang pơđĭ kyar mơng gơnong bruă hăng gum hrŏm pơđĭ kyar lŏn ia, ƀing gơmơi pơ-ư ang biă mă”.

Hơdôm rơtuh rơbâo čô mơnuih, hăng pran jua pơplông “Găn rơgao pơ-iă hơjan, mă bruă amăng hrơi pơdơi, hrơi ƀong tết, mă bruă tơhrơi kah hăng mlăm” kiăng kơ  hơdôm ară jơlan rơdêh đuăi hmar čuk pơkra giong djơ̆ thun blan ƀudah tañ ƀiă. Ba boh pơhiăp mơng kơ-iăng nai tha prin-nai prin thun Trần Chủng, Khua khul hơdôm anom bruă tuh pơ alin man pơdong jơlan glông Việt Nam lăi nao bruă mă mơng ƀing mơnuih hơmâo man pơkra rai hơdôm ring bruă pơprong:

“Ƀing ta kiăng pơdah pran tơlơi pơpŭ bơni hăng ƀing mơnuih mă bruă amăng gơnong bruă man pơdong jơlan glông mơ̆ wa Hô đưm hlâo hơmâo lăi lĕ “mơnuih pok jơlan”. “Ƀing pok jơlan glêh glar biă mă”. Yua anun ƀing ta kiăng pơpŭ bơni ƀing gơñu. Bơni ƀing mơnuih “glăk pok jơlan ră anai” hrơi anai, hơmâo pơkra rai hăng ƀing ta hơdôm ară jơlan rơdêh đuăi hmar pơhlôm rơnuk rơnua, pơtrut pơđĭ kyar bơwih ƀong huă, pơhlôm rơnuk rơnua brơi mơnuih ƀôn sang hăng wai pơgang anih dŏ hơdip jum dar”.

Rơbêh 3.500 km jơlan rơdêh đuăi hmar hơmâo man pơkra, pok rai tơlơi pơtrut phrâo brơi pơđĭ kyar lŏn ia hăng tŏ tui pran đăo gơnang hăng hơnong pơkă 5.000 km jơlan rơdêh đuăi hmar amăng thun 2030. Gah tlôn hơdôm ară jơlan prong rơhaih lĕ ia hâ̆o ia hang, tơlơi thâo thăi hăng pran jua mă bruă ƀu pơdơi mơng hơdôm rơtuh tơbâo čô kĩ sư, kông ñơn, ling tơhan Trường Sơn hăng hơdôm anom bơwih ƀong sĭ mơdrô Việt nam mă bruă amăng hrơi pơdơi, hrơi ƀong tết, tơhrơi mlăm ƀơi hơdôm ring bruă. Hơdôm ară jơlan ră anai lĕ atur brơi kơñ pơgi-kiăng Việt Nam hrưn đĭ kjăp phik, yak nao tañ ƀiă, ataih ƀiă amăng rơnuk hrưn đĭ mơng djuai ania ta./.