Tui hăng tơlơi lăi pơthâo, blan 1/2026, bruă bơwih ƀong huă - mơnuih mơnam hơđong mơn, lu bruă mă đĭ. Amăng bruă ngă hmua, bơyan Puih phang hăng bơyan Mơyan hơmâo pok pơhai djơ̆ hrơi pơkă. Bruă pơkra gơnam hăng măi mok đĭ mơn, hăng rơnoh pơkra gơnam đĭ giăm 16% pơhmu hăng tơđar. Bruă čơkă tuai hyu ngui hơmâo pơphun tŭ yua mơ̆ng akŏ thun mơtăm.

Ơi Tạ Anh Tuấn, Khua Jơnum min mơnuih ƀôn sang tơring čar Dak Lăk lăi dlăm tơlơi kiăng mơ̆ng hơdôm anom bruă, mơ̆ng să phương khŏm ngă bruă khut khăt, rơđah bruă, rơđah hrơi pơkă mơ̆ng blan blung a, mơ̆ng tơđar pơkă 3 blan ha wơ̆t thun 2026; lăng bruă brơi prăk tuh pơ alin ring bruă kơnuk kơna jao jing bruă kơđi čar akŏ phun, nao hrŏm hăng tơlơi gơgrong bruă mơ̆ng pô ngă khua ba jơlan hăng boh tŭ yua ba glăi. Ƀơi anăp, kiăng pơƀut lăng ba tơlơi ƀong Tê̆t Bính Ngọ, pơhlom abih bang leng kơ čơkă Tê̆t rơnuk rơnua, pơđao pran jua.