Anai lĕ jơlan hơdră pơphun prong biă mă mơ̆ng hlâo truh ră anai ƀơi hơdôm să kual guai dêh čar kah hăng Dak Wil, Thuận An, Thuận Hạnh, Quảng Trực hăng Tuy Đức. Amăng jơlan hơdră anai, hơmâo jao brơi rơbêh 2.600 anung gơnam truh pơ mơnuih ƀôn sang, khua mua apăn bruă, ling tơhan tŭ mă; pơphun lu tơlơi ngui ngor gru grua mơak, adoh suang "Mơak Ping gah, mơak Bơyan phang hăng pơphun man pơdong ƀut sang măi anih tuh tia pơkra ming gơnam sĭ mơdrô ƀơi să Quảng Trực".

Thiếu tướng Trần Chí Tâm, Kơ-iăng khua ping gah sang bruă tơhan kual 7, brơi thâo, bruă pơphun jơlan hơdră “Bơyan phang ling tơhan” hăng bruă ngă prong hloh mơ̆ng hlâo aka ƀu hơmâo djơ̆ ôh, sa tơlơi đing nao prong biă mă mơ̆ng Ping gah, Kơnuk kơna pioh kơ mơnuih ƀôn sang hăng ling tơhan amăng kual; mơ̆ng anun, kiăng djru hrŏm ngă kơjăp tui, akŏ pơdong kơjăp tơdron blah amăng pran jua ană plơi pơ anih rơnuč či guai dêh čar.